नेपाल एसिया कप टी-ट्वान्ट्वी क्रिकेट प्रतियोगिताका लागि छनोट हुन असफल भएको छ ।

ओमानमा शुक्रबार भएको सेमिफाइनल खेलमा यूएईसँग ६ विकेटले पराजित हुँदै नेपालको छनोट यात्रा टुंगिएको हो ।

नेपालले दिएको झिनो लक्ष्य यूएईले १७ ओभर २ बलमा ४ विकेट गुमाएर पूरा गर्‍यो । उसका लागि आलिशान शराफुले सर्वाधिक ५५ रनको पारी खेले ।

नेपालका गुल्सन झाले २ तथा सोमपाल कामी र ललित राजवंशीले १-१ विकेट लिए पनि जीतका लागि पर्याप्त भएन ।

त्यसअघि टस जितेर पहिले ब्याटिङ गरेको नेपाल ११९ रनमा सीमित भएको थियो ।  

नेपालका लागि सन्दीप जोराले ५०, गुल्सन झाले २० तथा करण केसीले १७ रन जोडे पनि अन्य ब्याटर सस्तैमा समेटिए ।

जीतसँगै यूएईले भने फाइनलमा स्थान बनाएको छ । यो प्रतियोगिता जित्ने टोली एसिया कप टी-ट्वान्टीमा छनोट हुनेछ ।