नेपाली कांग्रेसका नेता एवं सांसद प्रदीप पौडेलले नयाँ वर्षमा मुलुकलाई नयाँ ढङ्गले अगाडि बढाउनुपर्ने बताएका छन् ।

कांग्रेस काठमाडौं क्षेत्र नं ६ प्रदेश (क)ले नयाँ वर्षको उपलक्ष्यमा आज सपनतीर्थमा आयोजना गरेको ‘शुभकामना आदानप्रदान तथा वनभोज कार्यक्रम’मा विसं २०८१ मा नयाँ आशा र विधिको शासन स्थापनामा राजनीतिक दल लाग्नुपर्ने बताएका हुन् ।

काठमाडौं क्षेत्र नं ५ का सांसद पौडेलले निराशाले समस्याको समाधान नहुने भएकाले नयाँ आशाका साथ देशलाई अगाडि बढाउनुपर्नेमा जोड दिए । ‘विसं २०८० मा हरेक क्षेत्रमा धेरै प्रश्न उठेका छन्, यस वर्ष उत्तर खोज्ने गरी हामी लाग्नुपर्छ,’ उनले भने ।

नेता पौडेलले ८० को दशक निकै चुनौतीपूर्ण दशक रहेकाले यसको समाधानका लागि एकताबद्ध हुन जरुरी रहेको उल्लेख गरे । उनले जलवायु परिवर्तनका कारण वायुप्रदूषणसमेत अत्यधिक बढ्दै गएको भन्दै यसलाई न्यूनीकरण गर्न आवश्यक रहेको बताए । 

कांग्रेस काठमाडौंका सभापति सबुज बानियाँले नयाँ वर्षसँगै कांग्रेसलाई नयाँ ढङ्गले अगाडि बढाउनुपर्ने उल्लेख गरे । उनले कांग्रेसले मात्र देशलाई स्थायित्व दिनसक्ने भएकाले पार्टीलाई बलियो बनाउन सबै लाग्नुपर्नेमा जोड दिए । 

काठमाडौं क्षेत्र नं ६ प्रदेश (क)का सभापति एवम् काठमाडौं महानगरपालिका वडा नं २६ का वडाअध्यक्ष ख्यामराज तिवारीले पार्टीभित्र देखिएको गुठ उपगुठको अन्त्य गर्दै पार्टीलाई अगाडि बढाउनुपर्नेमा जोड दिए । कार्यक्रममा काठमाडौं क्षेत्र नं ६ प्रदेश ९क०का कांग्रेसका नेता तथा कार्यकर्ताको सहभागिता रहेको थियो ।