नेकपा एमालेका अध्यक्ष केपी शर्मा ओलीले वामपन्थी मात्रै मिलेर अगाडि बढ्ने अवस्था नरहेको बताएका छन् ।

एमालेले नेपाल कम्युनिस्ट पार्टी स्थापनाको ७५ वर्ष पुगेको अवसर पारेर मनाएको हीरक महोत्सवलाई सम्बोधन गर्दै ओलीले वामपन्थी होइन देशभक्त, विकास र समृद्धिलाई अगाडि बढाउने पक्षहरू मिलेर अगाडि बढ्नुपर्ने बताएका हुन् ।

‘प्रचण्डजीले भने जस्तै अहिले तत्काल पार्टी एकीकरण गरिहालौं, भइहाल्छ भन्नु व्यक्तिगत आकांक्षा तुष्टि मात्र हुन्छ । अहिलेको सहकार्यको माध्यमबाट निकट हुन्छौं । क्रमशः हामी एकताको बाटोमा पुग्न सक्छौं । अहिले नै एकीकरण गरौं, देशभरका मिलौं भन्यौं भने किन फुटेका थियौं ? के भएर फुटेका थियौं ? भनेर प्रश्न उठ्छन्', ओलीले भने, ‘सहमतिका लागि सहकार्यमा जाऊँ । वामपन्थी मात्रै मिलेर अगाडि बढ्ने अवस्था होइन । देशभक्त, राष्ट्रभक्त, सार्वभौमसत्ता, स्वाधीनता, अखण्डता, राष्ट्रिय स्वाभिमानका पक्षधर, भ्रष्टाचारविरुद्धको शक्ति अगाडि बढ्नुपर्छ । यस्तो नगरे देश बिथोलिन्छ ।’

राष्ट्रिय एकताको पक्षमा रहेका शक्ति मिलेर अगाडि बढ्ने उनले प्रस्ट्याए ।

‘एकताको दुई पक्ष छन् । अहिले सिंगो देश एक हुनुपर्छ । के कुरामा भने लोकतान्त्रिक गणतन्त्रलाई रक्षा र सबल बनाउँ । यसलाई माध्यम बनाएर सुशासन र विकासमा जाऊँ । विद्वेष होइन', ओलीले होइन, ‘लोकतन्त्रको विकल्प होइन रक्षा गर्ने मामिलामा सिंगो देश एक हुनुपर्छ । हुन सकिन्छ ।’

एउटा कुनामा बसेर हौसिएर प्रतिगमनको कुरा गर्न छोड्न चेतावनी दिँदै ओलीले पछिल्लो समीकरणले देशका समस्या, गरिबका समस्या समाधान र स्थिरता दिनुपर्ने बताए । 

२१ औं शताब्दीमा लोकतन्त्र आएका धेरै दशक भएपनि उर्वर भूमिमा भोकमरी र गरिबी चुनौतीको रुपमा रहेको उनले बताए । 

ओलीले २०५४ साल र २०७७/७ सालको पार्टी विभाजन हुन नहुने भन्दै यसलाई हानिकारक स्थितिको संज्ञा दिएका छन् । यस अवस्थाबाट फेरि उठ्नुपर्ने प्रण उनले गरेका छन् ।

नेकपा स्थापनाको एक सय वर्ष पुग्दा देशबाट गरिबी पूर्ण रुपमा अन्त्य हुने र यसको अगुवाइ एमालेले गर्ने उनले बताए ।