कप्तान रोहित पौडेलको उत्कृष्ट शतकीय इनिङका साथ नेपालले बलियो टोली वेस्ट इण्डिज ‘ए’विरुद्ध सनसनीपूर्ण जीत हासिल गरेको छ ।

२०५ रनको विशाल लक्ष्य पछ्याएको नेपालले टेस्ट टोली वेस्ट इण्डिजको ए टोलीलाई टी–२० सिरिजको पहिलो खेलमा ४ विकेटले पराजित गरेको हो ।

नेपालले २ बल बाँकी छँदै ६ विकेट गुमाएर २०५ रनको लक्ष्य पूरा गरेको हो ।

रोहितले ४७ बलमा शतक प्रहार गरेका हुन् । उनी ५४ बलमा ११२ रन बनाएर आउट भए । 

यस क्रममा उनले ६ छक्का र १० चौका प्रहार गरे ।

यस्तै दीपेन्द्रसिंह ऐरीले २४, कुशल मल्ल र कुशल भुर्तेलले १६–१६ रन जोडे ।

यसैगरी गुल्सन झाले अविजित ९ तथा प्रतिश जीसीले ५ रन बनाएपछि नेपालले लक्ष्य भेट्टायो । 

यसअघि विवेक यादव ७ र अनिल साह ५ रनमा आउट भएका थिए ।     

यसअघि वेस्ट इन्डिज ‘ए’ले टी–२० श्रृंखलाको पहिलो खेलमा घरेलु टोली नेपाललाई २०५ रनको चुनौतीपूर्ण लक्ष्य दिएको थियो ।

नेपालले टस जितेर फिल्डिङ रोजेपछि ब्याटिङमा उत्रिएको टेस्ट राष्ट्र वेस्ट इन्डिजले २० ओभरमा ५ विकेट गुमाएर २०५ रनको लक्ष्य दिएको हो । 

वेस्ट इन्डिजका लागि कप्तान रोस्टन चेजले सर्वाधिक ७४ रन बनाए । अर्धशतकीय पारी खेलेका उनलाई दीपेन्द्रसिंह ऐरीले आउट गराएका हुन् । 

दीपेन्द्रले अन्तिम ओभरमा ४ रन मात्रै दिएर १ विकेट लिए ।

पहिलो ओभरको अन्तिम बलमा कमलसिंह ऐरीले जोन्सन चाल्र्सलाई शून्यमा बोल्ड गरेका थिए । 

३.३ ओभरमा एन्ड्रे फ्लेचर रनआउट भएका थिए । 

वेस्ट इन्डिजका लागि अलिक अथान्जे २५ बलमा ४७ रन बनाए । उनलाई ६.५ ओभरमा कप्तान रोहित पौडेलले ललित राजवंशीबाट क्याचआउट गराएका हुन् । 

१४.२ ओभरमा ३८ रन बनाएर खेलेका केसी कार्टीलाई अविनाश बोहराले दीपेन्द्रबाट क्याचआउट गराएका हुन् ।