काठमाडौं– अबको १५ वर्षमा नेपालको आर्थिक अवस्था ब्रिटेनको बराबर पुर्‍यानका लागि नेकपाको उदय भएको नेकपाका उपाध्यक्ष तथा पूर्व उपप्रधानमन्त्री बामदेव गौतमले बताएका छन् । ५ वर्षमा नेपालमा गरिबी निवारण गर्ने तथा १० वर्षमा चमत्कारिक रुपमा नेपालले आर्थिक विकास गर्ने र नेपाललाई विकशित देशको दाँजोमा लगिने गौतमको दावी छ । 

भूतपूर्व ब्रिटिश गोरखा सैनिक तथा नागरिक सरोकार समाजले आयोजनको गरेको ‘भूतपूर्व व्रिटिश गोरखा सैनिकको व्रिटिश सैनिकमा देखिएका समस्या, व्रिटिश र गोरखाली सैनिकको तलब, पेन्सन, उपचार खर्च लगाएतका विषयमा माग राख्दै भूर्तपूर्व सैनिकहरु आन्दोलन’को पहिलो चरणको सुरुवात कार्यक्रममा गौतमले यस्तो बताएका हुन् । 

कार्यक्रममा गौतमले आफूहरुले पहिलेदेखि नै गोरखा सैनिकलाई सहयोग गर्दै आएकोमा हाल देखिएका समस्याका विषयमा प्रधानमन्त्री केपी शर्मा ओली र प्ररराष्ट्रमन्त्री प्रदीप ज्ञवालीसँग गर्ने बताए ।  भूतपूर्व गोरखा सैनिकको समस्या देशकै समस्या भएको उल्लेख गर्दै गौतमले यसमा आफू गम्भीर भएको बताए । 

कानूनविद् प्राध्यापक डाक्टर युवराज संग्रौलाले गोरखा सैनिकको सन्दर्भमा बेलायतले नेपाललाई ठूलो धोका दिएको बताए । 

बेलायतले नेपालका गोरखा सैनिकलाई तेस्रो देशमा पठाएर मानव तस्कर गरेको संग्रौलाले आरोप लगाए । ‘अर्को देशसँग सम्झौता गर्ने,  बीचमा आफू कमिशन खाने । तर ज्यानको बाजी लगाएका सैनिकको शोषण गर्ने ?’ संग्रौलाले प्रश्न गरे । 

आगामी दिनका लागि ब्रिटिस गोरखा सैनिकको भर्ना राकेर हिजोका दिनमा लडेका सैनिक परिवारले पाउनुपर्ने अर्बौं डलर बराबरको क्षति पाउनुपर्ने संग्रौलाको माग छ । 

गोरखा सैनिकका समस्या समाधानको लागि बेलायत र नेपालका विज्ञ र कर्मचारीसहितको उच्चतस्तरीय समिति गठन गरेर छानबिन हुनुपर्ने संग्रौलाले बताए । 

भूतपूर्व ब्रिटिस गोरखा सैनिक एलबी घिसिङले आफूहरुमाथि शोषण भएको उल्लेख गर्दै आफ्नो हकका लागि हदैसम्म जान पनि तयार रहेको बताए । 

यस्तै अर्का भूतपूर्व ब्रिटिस गोरखा सैनिक जुद्ध गुरुङले भूतपूर्व ब्रिटिस गोरखा सैनिकले पनि बेलायती सेनाकै कर्मचारीसरह सेवासुविधा, भत्ता र पेन्सन पाउनुपर्ने माग राख्दै आएको बताए । 

हालसम्म करिब ४ लाख ५० हजार नेपाली ब्रिटिस गोरखा सैनिकमा भर्ति भइसकेका छन् । जसमध्ये करिब १ लाख ५० हजार भूतपूर्व सैनिकहरु विभिन्न लडाईं र युद्धमा सहभागी भएर घाइते जीवन विताइरहेका छन् ।