काठमाडौं, ५ माघ — अल इन्डिया मजलिस–ए–इत्तेहादुल मुस्लिमीनका अध्यक्ष तथा सांसद असदुद्दीन ओवैसीले विवादास्पद हिन्दी फिल्म पद्मावतलाई बकवास बताएका छन् । उनले मुसलमानहरूलाई यो फिल्म नहेर्न अनुरोध गरेका छन् । 

वारंगल शहरमा बुधवार एक जनसभालाई सम्बोधन गर्दै ओवैसीले युवा मुसलमानहरूले पद्मावत हेर्दा समय र पैसाको बर्बादी मात्र हुने बताए । उनले यो ‘अलिच्छिनी’ र ‘घिनलाग्दो’ फिल्म भएको टिप्प्णी गरे । 

उनले भने, ‘फिल्म नहेर्नुस् । भगवानले तपाईंलाई दुई घन्टाको फिल्म हेर्नका लागि बनाएका होइनन् । उनले तपाईंलाई राम्रो जीवन बाँच्न र जीवनमा राम्रो काम गर्न बनाएका हुन् जसकारण तपाईंलाई शताब्दियौंसम्म याद राख्न सकिन्छ ।’

ओवैसीले थपे, ‘यो बकवास फिल्मको रिभ्युका लागि प्रधानमन्त्री नरेन्द्र मोदीले १२ सदस्यीय प्यानल गठन गरेको र अनेकौं दृश्य हटाएको बताए । यो फिल्मको कथा मलिक मोहम्मद जायसीले सन् १५४० मा लेखेका हुन् तर यसको ऐतिहासिक प्रमाण छैन । तैपनि उपन्यासमा आधारित फिल्म देखाउनका लागि सरकारले चासो देखाएको छ ।’ 

एजेन्सी