लक्ष्यअनुरूप शुरु भएन सिटामोल उत्पादन, कहिले आउला बजारमा ?

जीवनजल उत्पादन गर्दै प्राविधिक

माघ २९, २०७४

काठमाडौं, २९ माघ- माघ महिनाबाट सिटामोल उत्पादन गर्ने सरकारी स्वामित्वको नेपाल औषधि लिमिटेडको योजना असफल भएको छ ।

सात वर्षदेखि बन्द उत्पादन यही माघ पहिलो साताबाट थाल्ने लिमिटेडको लक्ष्यथियो ।

औषधि उत्पादनका लागि विश्व स्वास्थ्य संगठनले तोकेको मापदण्डअनुसार जीएमपी मोडलमा कारखाना निर्माण भइसकेको छ ।

औषधि लिमिटेडका महाप्रबन्धक रोभसकुशम सुवेदीले भवन निर्माणको कार्य सकिसकेको र आवश्यक मेसिनहरू पनि आइसकेको भए पनि योजनाअनुरूप माघबाटै औषधि उत्पादन गर्न नसकेको स्वीकार गरे ।

‘चक्की औषधि उत्पादनका लागि भवन निर्माणको काम सकिएको छ, आवश्यक मेसिनहरू पनि ल्याइसकेका छौँ, तर मेसिन जडान गर्ने इञ्जिनिय नआइपुग्दा काम रोकिएको छ,’ महाप्रबन्धक सुवेदीले लोकान्तरसँग भने ।

आगामी साता प्राविधिक आउने र त्यसपछि मेसिन जडान गरेर उत्पादन शुरु हुने सुवेदीले जानकारी दिए । उत्पादन फागुन पहिलो साताबाटै शुरु भए पनि बजारमा आउन भने समय लग्ने उनको भनाइ छ । ‘उत्पादन शुरु भएको १५÷२० दिनमा १५ लाख ट्याब्लेट उत्पादन हुन्छ, त्यसपछि मात्रै बजारमा लैजान्छौँ,’ सुवेदीले भने ।

लिमिटेडले सिटामोल लगायतका चक्की औषधि उत्पादनका लागि ३ वटा नयाँ ‘ट्याब्लेट कम्प्रेसर’मेसिन खरिद गरेको छ । यस्तै दुईवटा पुराना मेसिनको मर्मतसम्भार गरिएको छ । सिटामोल उत्पादनको लागि पनि आइसकेको छ ।

लिमिडेटले चक्की औषधि जीएमपी मोडलको कारखानामा उत्पादन गर्नेछ । विश्व स्वास्थ्य संगठनका अनुसार औषधि उत्पादन गर्ने कक्ष र उपकरणलाई किटाणुरहित तथा हावा छिर्न नसक्ने अवस्थाको बनाउनु पर्ने हुन्छ । त्यसलाई जीएमपी मोडल अर्थात असल उत्पादन प्रणाली भनिन्छ ।

सरकारले १५ करोड बजेट विनियोजन गरेपछि सिटामोल उत्पादन पुनः शुरु हुन लागेको हो । उद्योगले पहिलो चरणमा उद्योगको ब्राण्डको रूपमा चिनिएको सिटामोल, आइरन चक्की, जुकाको औषधि लागायत २० प्रकारका चक्की औषधि उत्पादन गर्ने लक्ष्य लिएको छ ।

२०२९ सालमा सरकारी स्वामित्वमा सञ्चालनमा आएको उद्योग जीएमपी मोडलमा जान नसक्दा २०६७ सालमा बन्द भएको थियो । लिमिटेडले जीवनजल भने एक वर्ष अघिबाटै उत्पादन गर्दै आएको छ ।

माघ २९, २०७४ मा प्रकाशित

रिता लम्साल

रिता लम्साल लोकान्तरका लागि स्वास्थ्य र सामाजिक मामिलामा कलम चलाउँछिन् । 

लेखकबाट थप...

प्रतिक्रिया दिनुहोस