धनगढी, ५ चैत- प्रदेश नम्बर ७ को प्रमुख पर्यटकीय क्षेत्र खप्तडमा अन्तर्राष्ट्रिय पद यात्रा तथा काव्य सम्मेलन हुने भएको छ ।

डोटी, बझाङ, अछाम र बाजुरा जिल्लामा फैलिएको उक्त खप्तड क्षेत्रमा नेपाल साहित्य तथा संस्कृति प्रतिष्ठान गोदावरी कैलालीले अन्तर्राष्ट्रिय सांस्कृतिक पद यात्रा तथा काव्य सम्मेलन गर्ने भएको छ ।

धनगढीमा सोमबार आयोजित पत्रकार सम्मेलनमा प्रतिष्ठानका अध्यक्ष पदमराज जोशीले पत्रकार, साहित्यकार, लेखकको सहभागितामा सांस्कृतिक पुनर्जागरण आन्दोलनको रूपमा वैशाख अन्तिम साता सम्मेलन गर्न लागिएको जानकारी दिए । उनले सम्मेलनमा नेपाल र भारतका करीब ५० बढी पत्रकार, साहित्यकार, लेखकहरुको सहभागिता रहने जनाए ।

सम्मेलले खप्तडको विकास र प्रदेश नम्बर ७ कोे आर्थिक मेरुदण्डको रुपमा रहेकोे धार्मिक र प्राकृतिक पर्यटनको सम्भावनालाई पर्यटकीय स्थल बनाउन टेवा पुग्ने जोशीले विश्वास व्यक्त गरे ।

राष्ट्रपति, प्रधानमन्त्री, मन्त्री, नेपाली सेना लगायतका समते सहभागी गराउने लक्ष्य लिइएको पद यात्रा तथा सम्मेलन कार्यक्रम अन्तर्गत चार धाम यात्राको सम्भाव्यता अध्ययनका लागि गोदावरी, पर्शुराम, दिल्पेश्वर र वैद्यनाथको अवलोकन दर्शन गराइने समेत जनाइएको छ ।

१,२६२ देखि ३,२७६ मिटरसम्म फैलिएको खप्तड क्षेत्रलाई सरकारले ०४३ असार ९ गते खप्तड राष्ट्रिय निकुञ्ज घोषणा गरेको थियो । २२५ वर्ग किमिमा फैलिएको निकुञ्जले बाजुरा, डोटी, बझाङ र अछामको भूमि समेटेको छ । 

प्राकृतिक सुन्दरताले भरिएको खप्तडलाई अध्यात्म, योग र ध्यान गर्न लायक गन्तव्यको रुपमा पनि लिइन्छ । ठूल–ठूला पाटन (चौर), दह, जीवजन्तु र हिमाल त्यहाँको सौन्दर्य हो । 

जैविक विविधताले भरिएको उक्त क्षेत्रमा २२ वटा पाटन छन् । सयौं थरी चरा, ३७२ प्रजातिका वनस्पति र १३० थरिका जडीबुटीसमेत पाइन्छ ।