काठमाडौं, १२ वैशाख– पर्यटक भिसामा नेपाल घुम्न आएका एक विदेशी नागरिक प्रतिबन्धित लागू औषध (ड्रग्स्) सहित पक्राउ परेका छन् । 

महानगरीय प्रहरी बृत्त लैनचौरबाट खटिएको प्रहरी टोलीले काठमाडौं ठमेलको सात घुम्तीबाट जोर्डन नागरिकलाई लागू औषधसहित पक्राउ गरेको छ । पक्राउ पर्नेमा जोर्डन नागरिक याजिड नायल छन् । 

राहदानी नम्बर ०३२३५२३ बोकेका नायललाई लागू औषध एमफेटामिन ट्याब्लेट १४ थानसहित पक्राउ गरिएको महानगरीय प्रहरी परिसर काठमाडौंका प्रमुख प्रहरी उपरीक्षक विश्वराज पोखरेलले बताए । 

प्रहरीले काठमाडौंबाट थप दुईजनालाई लागू औषधसहित पक्राउ गरेको छ । केही व्यक्तिको समूह प्रतिवन्धित नाइट्रोभेट र ट्रामा नामक लागू औषध बिक्री गर्दै हिँडिरहेको सूचनाका आधारमा काठमाडौं–७ बाट २ जनालाई पक्राउ गरिएको महानगरीय प्रहरी बृत्त बौद्धले जनाएको छ । 

पक्राउ पर्नेमा काठमाडौंको सरस्वतीनगरका २१ वर्षीय इभेन्द प्रसाईं र सोही ठाउँका २६ वर्षीय प्रविन थापा छन् । उनीहरुको साथबाट नाइट्रोभेट ९०० क्याप्सुल र ट्रामा ६०० क्याप्सुल बरामद गरिएको प्रहरीले जनाएको छ ।