विराटनगर, ९ जेठ– सुन तस्करी र सनम शाक्य हत्या प्रकरणका मुख्य अभियुक्त गोरे भनिने चूडामणि उप्रेतीको बयान जिल्ला अदालत मोरङमा शुरु भएको छ । 

मंगलवार बिहान ‘पक्राउ परी’ अदालतमा उपस्थित गराइएका गोरेको बुधवार बिहानदेखि अदालतमा बयान लिन शुरु गरिएको हो । 

मोरङ जिल्ला अदालतका न्यायाधीश नारायणप्रसाद शर्माको इजलासमा गोरेले बयान दिइरहेका छन् । 

गोरेले अदालतमा बयान दिँदा उनको पक्षबाट २ जना वकिल उपस्थित भएका जनाइएको छ । स्रोतका अनुसार अधिवक्ता भरत थापा र अर्का एक अधिवक्ता गोरेको प्रतिरक्षामा उत्रिएका छन् । 

गोरेको बयान सकिएपछि उनको थुनछेक बहस हुनेछ । थुनछेक बहसमा जिल्ला सरकारी वकिलको कार्यालयका वकिलले बहस गरेपछि प्रतिवादी (गोरे)का वकिलले बहस गर्नेछन् ।