विराटनगर, १० असार – १ नम्बर प्रदेश सभाले सरकारद्वारा प्रस्तुत विनियोजन विधेयक २०७५ पारित गरेको छ ।

आज बसेको प्रदेशसभा बैठकमा आर्थिक मामिला तथा योजना मन्त्री ईन्द्रबहादुर आङ्वोले विधेयक पारित गरियोस् भनी पेस गरेको प्रस्ताव बहुमतले पारित गरेको हो । त्यसअघि विधेयकमाथि नेपाली कांग्रेसका सांसद शिवनारायण गनगाईले राखेको खर्च कटौतिको प्रस्ताव प्रदेश सभाको बहुमतले अस्वीकृत गरेको छ ।

कांग्रेस सांसद गनगाईले विधेयकमा रहेको भैपरी चालूतर्फको ४३ करोड ३७ लाख ३ हजार २ सय ७ रुपैयाँ, विविध भैपरी शीर्षकको ८० करोड रुपैयाँ र भैपरी पुँजीगतमा रहेको ४८ करोड ८८ लाख ८० हजार रुपैयाँलाई कटौति गर्न प्रस्ताव पेश गरेका थिए । उनले ती सबै शीर्षकमा ५ सय रुपैयाँ मात्र राख्न गरेको प्रस्ताव प्रदेश सभाले अस्वीकृत गरेको हो ।

खर्च कटौतिको प्रस्तावमाथि जवाफ दिँदै आर्थिक मामिला तथा योजना मन्त्री आङ्वोले मुख्यमन्त्री ग्रामिण सडक कार्यक्रम र सार्वजनिक निजी साझेदारी कार्यक्रमका लागि सो बजेट मन्त्रालय मातहत राखिएको जानकारी दिए ।