काठमाडौं – ब्राजिली फूटबल खेलाडी फर्मिनोले लीगविजेता म्यानचेस्टर सिटीलाई चेतावनी दिँदै लिभरपूलले उपाधि जित्नका लागि सबै प्रयास गर्ने बताएका छन् । 

लिभरपूलले समर ट्रान्सफर विन्डोमा १७७ मिलियन पाउन्ड खर्च गरेपछि अनि पहिलो खेलमा लिभरपूलले वेस्ट ह्यामलाई ध्वस्त पारेपछि क्लबका प्रशंसक खुशी भएका छन् । 

सोमवार लिभरपूलले क्रिस्टल प्यालेसमा गएर भिडन्त गर्दैछ र क्लबका स्टार फर्मिनोले युर्गेन क्लोपको प्रशिक्षणमा आफूहरूले उपाधि जित्न सक्षम रहेको बताएका छन् । 

‘लिभरपूल यो सीजनमा सर्वोच्च उपाधि जित्नका लागि सक्षम रहेकोमा म आशावादी छु र त्यसमा विश्वास पनि गर्छु,’ स्ट्राइकर फर्मिनोले भने । लिभरपूलले गत सीजनमा चौथो स्थान हासिल गरेकोमा फर्मिनोले २७ गोल गरेका थिए । 

‘अघिल्लो सीजनमा भन्दा टीम झन् बलियो भएको र नयाँ आएका खेलाडीले टीमको प्रदर्शनमा सुधार ल्याउनेछन् । हामीले मैदानमा नै प्रदर्शन गरेर आफूहरू अब्बल रहेको देखाउनुपर्छ । नयाँ खेलाडीलाई टीममा छिट्टो घुलमिल हुन गाह्रो छ । तर म जहिले पनि सकारात्मक सोच राख्छु ।’

‘मेरो सपना लिभरपूलका तर्फबाट प्रिमियर लीग उपाधि उचाल्नु हो र हामी त्यसका लागि प्रयास गरिरहेका छौं ।’

एनफील्डमा तीन वर्ष बिताइसकेका फर्मिनोले प्रिमियर लीग उपाधि कहिल्यै नउचालेको टीमका प्रशंसक त्यसको आशामा रहेको बताए । 

लिभरपूलले प्रिमियर लीग युग शुरू हुनुअघि सन् १९८९–९० को सीजनमा उपाधि जितेको थियो । त्यसपछि ऊ खाली हात रहँदै आएको छ ।

एजेन्सी