काठमाडौं — फ्रान्समा चलिरहेको पहेंलो ज्याकेट आन्दोलनका कारण पेरिसस्थित सुप्रसिद्ध आईफल टावर शनिवार बन्द गरिने भएको छ । 

सरकारविरोधी आन्दोलन चर्किंदै जाँदा सडकमा धेरै हिंसा भएका छन् । 

फ्रान्सभरि ८९ हजार प्रहरी अधिकारीहरूलाई सतर्क अवस्थामा राखिएको र राजधानीमा सशस्त्र गाडीहरू तैनाथ गरिएको प्रधानमन्त्री एडूआर्ड फिलिप्पेले बताए । 

प्रहरीले पेरिसको शम्श एलीसीजमा रहेका पसल र रेस्टुराँहरू बन्द गर्न आग्रह गरेको छ अनि केही संग्रहालय पनि बन्द गरिनेछन् । 

अघिल्लो शनिवार पेरिसमा दशकौंयताको सबभन्दा खराब दंगा भएको थियो । 

इन्धनमा कर बढाउने सरकारको निर्णयका कारण आन्दोलन चर्केको हो र त्यसलाई तत्कालका लागि फिर्ता लिने सरकारले जनाएको छ । 

तर सरकारविरुद्ध अन्तोषका अन्य विषय पनि रहेकाले आन्दोलनहरू कायमै छन् । 

गृह मन्त्रालयका एक अधिकारीले शनिवार भयंकर हिंसा हुने आँकलन गरेर त्यसका लागि अधिकारीहरू तयार भएर बसेको बताए । उग्रदक्षिणपन्थी र उग्रवामपन्थी दुवैथरी पेरिसमा जम्मा भएका छन् । 

बीबीसीबाट