बेझाड- पाल्पाको रामपुरमा प्याराग्लाइडिङको सफल उडान गरिएको छ । प्याराग्लाइडिङले प्रचुर सम्भावना बोकेको रामपुर नगरपालिका–७ स्थित बाहुनडाँडामा सोमबार सफल परीक्षण उडान गरिएको हो । 

रामपुर नगरपालिका–७ को बाहुनडाँडा र पूर्वखोला गाउँपालिका–१ सिलुवाको लोस्दीबाट परीक्षणका रुपमा १६ प्याराग्लाइडिङ उडान गरिएको थियो । पहिलो उडान बााहुनडाँडाबाट थालेर किसानबारी खेलमैदानमा अवतरण गराइएको थियो । दोस्रो उडान सिलुवाको लोस्दीबाट थालेर मटेरी ठूलोटारमा अवतरण गराइएको थियो । गिनिज बुकमा नाम रेकर्ड गर्न सफल सानुबाबु सुनुवारको नेतृत्वमा प्याराग्लाइडिङ उडान गरिएको हो । 

“रामपुर प्याराग्लाइडिङका लागि अत्यन्तै सम्भावना बोकेको ठाउँ छ,” उहाँले भन्नुभयो । छब्बीस जिल्लामा प्याराग्लाइडिङ उडान गरिसकेका सुनुवारले नयाँ ठाउँ खोजी गर्ने क्रममा बाहुनडाँडा र सिलुवाको लोस्दीलाई छनोट गरिएको बताउनुभयो । “यहाँ एक हजार २६६ मिटर उडेर लगभग तीन हजार मिटर माथिसम्म जान सकिने सम्भावना छ,” उहाँले भन्नुभयो, “यहाँबाट उडेर तराई र हिमालको काखसम्म पुग्न सक्ने सम्भावना छ ।” 

रामपुर नगरपालिका क्षेत्रलाई प्याराग्लाइडिङको हबका रुपमा चिनाउन अभियान थालिने नगर प्रमुख रमणबहादुर थापा बताउनुहुन्छ । “पूर्वाधार विकास गरी रामपुरलाई पर्यटन प्रवद्र्धनका लागि प्याराग्लाइडिङ उडान सेवा सञ्चालन गर्नयोग्य बनाउँछौँ, नगरपालिकाले प्रक्रिया अगाडि बढाउँदैछ”, उहाँले भन्नुभयो । उहाँ आफैँले प्याराग्लाइडिङमा यात्रा गरेपछि ध्यान केन्द्रित भएको बताउनुभयो । नागबेली आकारमा बगेको कालीगण्डकी, हरियाली डाँडाकाँडा, सुन्दर रामपुर उपत्यका, उत्तरतर्फ टल्केका हिमालको दृश्यसँगै प्याराग्लाइडिङमा यात्रा गर्दा निकै रमाइलो भएको पहिलो प्याराग्लाइडिङका यात्रु रामपुर नगरपालिका–६ का सीताराम आचार्यले बताउनुभयो । 

रामपुरमा प्याराग्लाइडिङको सफल उडानपछि रामपुरवासी खुशि भएका छन् । प्याराग्लाइडिङ उडानकै कारण गाउँको विकास हुने उनीहरुको आशा छ । विकास निर्माण नहँुदा यहाँ बसाइँसराइका कारण बस्ती पातलिँदै गएको छ । अब छिट्टैनै प्याराग्लाइडिङ सञ्चालनको काम अगाडि बढाउन थालेपछि पुनःबस्ती भरिने वडा नं ७ का वडाध्यक्ष तीर्थप्रसाद पँगेनी बताउनुहुन्छ । दुई वर्ष अघि राष्ट्रिय समाचार समितिमा ‘प्याराग्लाइडिङको प्रचुर सम्भावना बोक्दै बाहुनडाँडा क्षेत्र’ समाचार प्रकाशित भएपछि यसबारे खोजीनीति गरिएको हो ।

सरकारीस्तरको टोलीले यहााको अध्ययन अवलोकन गरी प्याराग्लाइडिङका रुपमा विकास गर्न सकिने भन्दै सम्बन्धित निकायको ध्यानाकर्षण गराएको थियो । दोस्रो रामपुर महोत्सवमा सोमबार दिनभर सबैको ध्यान प्याराग्लाइडिङले आकर्षित गरेको थियो । रामपुरको पर्यटकीय विकासमा टेवा पु¥याउनका निम्ति मेलाका अवसरमा प्याराग्लाइडिङ भित्र्याइएको रामपुर उद्योग वाणिज्य सङ्घका अध्यक्ष भोजेन्द्रप्रकाश ढकालले बताउनुभयो ।