काठमाडौं— ‘ब्रेक्जिट डिल’ अर्थात युरोयिन युनियनबाट बेलायत बाहिरिने सम्बन्धी प्रधानमन्त्री टेरिजा मेको प्रस्ताव संसदमा अस्वीकृत भएको छ । प्रधानमन्त्री मेको प्रस्ताव संसदमा ठूलो बहुमतसहित अस्वीकृत भएको हो ।ब्रेक्जिट सम्बन्धि प्रधानमन्त्री मेको प्रस्तावमा गएराती बेलायती संसदको तल्लो सदन हाउस अफ कमन्समा मतदान भएको थियो ।

बेलायतमा कुनै पनि सरकारले संसदमा पेश गरेका विधेयक वा योजनामा यो अहिलेसम्मकै ठूलो झड्का हो । दुई वर्षभन्दा बढी समय लगाएर तयार पारेको ब्रेक्जिट डिल अस्वीकृत हुनु प्रधानमन्त्री मेका लागि निकै ठूलो धक्का हो । उनले यो योजनामा मार्च २९ देखि २१ महिनाको अवधिमा बेलायत इयुबाट अलग हुने आधार तय गरेकी थिइन् । 

प्रस्तावको विपक्षमा ४३२ सांसदले मत दिए । पक्षमा २०२ सांसदले मत दिएको बिबिसीले उल्लेख गरेको छ । प्रधानमन्त्री मे कै कन्जरभेटिभ पार्टीका ११८ सांसदले विपक्षमा मत दिएका हुन् । प्रधानमन्त्री मेको बे्रक्जिट सम्बन्धी प्रस्तावमा आउँदो मार्च २९ मा इयुबाट बेलायतको औपचारिक अलग हुने प्रक्रियाका आधारहरु तय थिए । 

प्रधानमन्त्री मेको योजना ऐतिहासिक रुपमा विफल भएपछि विपक्षी लेबर पार्टीले संसदमा सरकारविरुद्ध अविश्वासको प्रस्ताव दर्ता गरेको छ । लेबर पार्टीका नेता जेरेमी कोर्बिनले संसदमा अविश्वासको प्रस्ताव पेश गरेका हुन् । अश्विासको प्रस्तावमाथि संसदमा बुधबार (नेपाली समय अनुसार बुधबार राति पौने १ बजे) मतदान हुने तयारी छ । प्रधानमन्त्री मेले विश्वासको मत लिन नसकेमा बेलायतमा आम चुनाव गर्नु पर्ने हुन सक्छ ।