सुर्खेत – कर्णाली प्रदेशका मुख्यमन्त्री महेन्द्रबहादुर शाहीले कर्णाली प्रदेशमा हालसम्म अर्बौ बजेट आएपनि केही परिवर्तन नभएको बताएका छन् ।

शुक्रवार वीरेन्द्रनगरमा युवा गैरसरकारी संस्था महासंघ नेपाल कर्णाली प्रदेशको साधारण सभालाई सम्बोधन गर्दै मुख्यमन्त्री शाहीले केही संस्थाका कारण कर्णालीमा विकास हुन नसकेको र त्यस्ता संस्थालाई बन्द गराउनुको विकल्प नभएको बताए ।

‘गाउँ बस्तीमा सयौं संस्थाले काम गरिरहेका छन् । ती संस्थाले अर्बौ बजेट खर्चिरहेका छन्,’ उनले भने, ‘त्यो अर्बौ पैसा कहाँ गयो ?’

मुख्यमन्त्री शाहीले जसका लागि सहयोग गर्न खोजेको हो, उसैलाई सहयोग गर्ने संस्थालाई सरकारले प्राथमिकता दिने जानकारी दिए । ‘हामीलाई विकासको भोक छ । धेरै लगानी पनि आवश्यक छ,’ उनले भने, ‘यदि कोही हामीलाई सहयोग गर्न चाहन्छ भने प्रदेश सरकारको खातामा बजेट देओस् । नत्र आफूले (बाहिरका कार्मचारी) डेढ लाख तलब खाने र कर्णालीका युवालाई १५–२० हजार तलब दिएर काममा घोटाउने जस्तालाई बन्द गर्नुपर्छ भन्ने मेरो धारणा हो ।’

उनले सरकारले आईएनजीओ तथा एनजीओलाई राम्रा काम गर्न दिने बताए । ‘हामी संस्था विरोधी होइनौं । राम्रो काम गर्ने संस्थालाई सरकारले प्रोत्साहन पनि दिन्छ,’ उनले भने, ‘परिवर्तन देखिने खाले काम गर्ने संस्थाहरूलाई सरकारले काम गर्ने वातावरण बनाउँछ । तर काम नगर्ने तथा आफू समृद्ध हुने संस्था बन्द नै गर्नुपर्छ ।’

मुख्यमन्त्री शाहीले कर्णालीलाई समृद्ध बनाउने हो भने होटलमा बसेर कुरा गरेर नहुने बताए । ‘धुलिखेल, काठमाडौं वा कर्णालीकै ठूला होटलमा समृद्धिका गफ गरेर कर्णालीमा समृद्धि आउँदैन,’ उनले भने, ‘कर्णालीमा समृद्धि ल्याउने हो भने माटोसँग खेल्नुपर्छ । पहाड फुटाउनुपर्छ ।’

मुख्यमन्त्री शाहीले उत्पादनका आधारमा कृषकलाई पेन्सन दिने योजना सरकारको रहेको बताए । ‘२ सय बाख्रा, ५० गाई पाल्ने किसानलाई सरकारले पेन्सन दिने योजना बनाएको छ । २ सय बाख्रा नहुनेका लागि २० वटा बाख्रा अनुदान दिने र उत्पादन बढाउँदै किसानलाई पेन्सन दिनेछौं,’ उनले भने । उनले समाजमा जबसम्म अन्तर्विरोध रहिरहन्छ, तबसम्म शान्ति नहुने र शान्ति नभएसम्म विकास र समृद्धि नहुने बताए ।