काठमाडौं –  जुलाई २१ (साउन ५) मा चन्द्रमामा पहिलोपटक मानव पाइला परेको ५० वर्ष पुग्याे । 

अमेरिकी अन्तरिक्ष नियोग नासाले पठाएको एपोलो ११ नामक रकेटबाट सन् १९६९ को जुलाई २० (नेपाली समयमा त्यसको भोलिपल्ट) मा अन्तरिक्षयात्रीहरू नील आर्मस्ट्रोङ र बज आल्ड्रिन चन्द्रमामा पुगेका थिए । 

उनीहरूले चन्द्रमामा पाइला टेकेको दृश्य ६५ करोड मानिसले टीभीमा हेरेका थिए । 

तर नासाको यो आधिकारिक कथनलाई नपत्याउने मानिसहरू धेरै छन् । उनीहरू नासाले पृथ्वीमा एक स्टुडियोमा चन्द्रमाको जस्तो सतह निर्माण गरेर भिडियो बनाएको भन्ठान्छन् । 

बिल केसिङ नामक व्यक्तिले चन्द्रमामा मानव पाइला एक षड्यन्त्र सिद्धान्त मात्र भएको बताए र त्यसको खुबै प्रचारप्रसार गरे । 

उनले खासमा अमेरिकाको अन्तरिक्ष कार्यक्रममा सानोतिनो योगदान गरेका थिए । स्याटर्न भी रकेट इन्जिन डिजाइन गर्ने कम्पनीमा उनी काम गर्थे ।

सन् १९७६ मा उनले एउटा पम्फ्लेट प्रकाशित गर्दै अनेक किसिमका षड्यन्त्र सिद्धान्त प्रतिपादन गरे । त्यसको शीर्षक छ– वी नेभर वेन्ट टु द मून ः अमेरिकाज थर्टी बिलियन डलर स्विन्डल ।

उनको पम्फ्लेटले षड्यन्त्रहरूको शुरूआत गरेको थियो र त्यो अहिलेसम्म कायम छ । 

हालै यूगोभले गरेको सर्वेक्षणमा ६ मध्ये एक बेलायतीले निम्न भनाइ पत्याए : ‘चन्द्रमामा पाइला टेकेको कुरा नाटक हो ।’

बिल केसिङ ८२ वर्षको उमेरमा सन् २००५ मा बिते तर उनले चलाएको षड्यन्त्र सिद्धान्त अहिलेसम्म जीवित छ र इन्टरनेटले यसलाई थप फैलाइरहेको छ । 

नासाले एउटा स्टुडियोमा चन्द्रमामा अवतरण गरेको नाटक गरेको भनी केसिङले जिन्दगीभरि तर्क गरिरहे । चन्द्रमा अवतरणको फोटोमा तारा नदेखिएको, झण्डा फर्फराइरहेको, विभिन्न कोणमा छायाँ देखिएको र ईगल ल्यान्डर अवतरण गर्दा कुनै खाल्डो नबनेको कुराले आफ्नो सिद्धान्त पुष्ट हुने बताउने गरेका थिए । 

केसिङका यी सिद्धान्तलाई धेरै विज्ञहरूले खण्डन गरेको भए पनि मानिसहरूले त्यसलाई पत्याउन छोडेका छैनन् ।

नासासँग अन्तरिक्षयात्रीलाई चन्द्रमामा राखेको निकै धेरै प्रमाण छ र उसले चन्द्रमाका ढुंगा जम्मा गरेको छ । अनि नासा लुनार रिकोनेसा अर्बिटर नामक भूउपग्रहले चन्द्रमामा मानवपाइलाको ट्य्राक छोडेको तस्वीर समेत सुरक्षित राखेको छ ।

एजेन्सी