सुर्खेत - कर्णाली प्रदेश सरकारको भौतिक पूर्वाधार विकास मन्त्रालयमा कार्यालय सहयोगी र हलुका सवारी चालकको मात्रै दरबन्दी पूर्ण भएको पाइएको हो । ३ सय ६५ जनाको दरबन्दी भएको मन्त्रालयमा २ सय २३ जनाको मात्रै पदपूर्ति भएको पाइएको हो ।

१ सय ४२ जना कर्मचारी अझै मन्त्रालयमा अपुग भएका छन् । तर हलुका सावारी चालक र कार्यालय सहयोगीको १५/१५ जनाको दरबन्दी भएपनि दुवैमा पदपूर्ति भइसकेको मन्त्रालय श्रोतले जनाएको छ ।

मन्त्रालयमा १९ सिनियर डिभिजनल इन्जिनीयरका पद रिक्त छन् । जम्मा दरबन्दी संख्या २३ हो । ७ वटा दरबन्दी भएको शाखा अधिकृत तहमा ४ जनाको पदपूर्ति भएको छैन ।

विभिन्न तहका ८१ ओटा इन्जिनियरका पदहरुमा ५८ जनाको पदपूर्ति हुन सकेको छैन । एक जना लेखापालको दरबन्दी रिक्त छ । ६६ ओटा सब इन्जिनियरको दरवन्दी मन्त्रालयमा छ तर हाल ३९ जनाको पद रिक्त रहेको छ ।

सिनियर डिभिजनल इन्जिनियर ३ जना, इन्जिनियर ८ जना, सब इन्जिनियर १ जना, एओ एक जना गरी १४ जना केहि दिनमा नै मन्त्रालयमा हाजिर हुनेछन् । यस्तै अन्य प्रदेश र संघ वा स्थानीय तहमा समायोजन भइसकेका तर हाल मन्त्रालयमा काम गरिरहेका कर्मचारीहरुको संख्या १२ जना छ ।

सचिव दानरत्न शाक्य, सिनयिर डिभिजनल इन्जिनियर दुइ जना, ८ जना इन्जिनियर, एक जना सिएओ, यहि काम गरिरहेका छन् । मन्त्रालयका सचिव दानरत्न शाक्य कर्मचारी त्यति धेरै अभाव नभएको दाबी गर्छन ।

‘कोहि कर्मचारी सरुवा भएर आउँदै छन्,' उनी भन्छन्, ‘कर्मचारी न्यून भएपनि काम भने भइरहेको छ ।’ उनले हरेक जिल्ला वा कार्यालयहरूमा एक दुई जना इन्जिनीयरहरु खटाइसकिएको बताए ।

कर्मचारी नभए गत वर्षको जस्तै बजेट खर्च नहुने त होला नी भन्ने प्रश्नमा उनी भन्छन्, ‘अहँ त्यस्तो हुँदैन । गत वर्षका बहुवर्षिय ठेक्कामा काम सुरु भइरहेको छ,' उनले भने, ‘गत वर्ष कार्यालय माघमा खोलेकाले पनि कम खर्च भएको जस्तो देखिएको हो । यो वर्ष हामी फुल फेजमा काम गर्छौं ।’