कृषि तथा पशुपन्छी विकास मन्त्री घनश्याम भुसालले कृषिक्षेत्रमा कम्तीमा डेढ देखि २ लाखसम्म रोजगारी सिर्जना गर्नेगरी आफूले काम गरिरहेको बताएका छन् ।

मंगलवार श्रम तथा रोजगार पत्रकार समूहले आयोजना गरेको भिडियो कन्फरेन्समा बोल्दै मन्त्री भुसालले कोभिड १९ का कारणले संकुचनमा फँसेको अर्थतन्त्र सुधार्न कृषि क्षेत्रले ठूलो योगदान गर्ने गरी आफू अघि बढेको बताएका हुन् ।

‘हामीले करीब डेढ देखि २ लाखसम्मलाई रोजगारी दिने गरेर काम अघि बढाएका छौं,’ मन्त्री भुसालले भने, ‘त्यसका लागि ५ वटा शीर्षकमा काम गरिरहेका छौं ।’

मन्त्री भुसालले मल, बिऊ अनुदान, प्राविधिक सेवा, वित्तीय सेवा, बीमा व्यवस्था र कृषि उत्पादनको न्यूनतम समर्थन मूल्य तोक्ने गरी मन्त्रालय अघि बढेको बताए ।

मन्त्री भएपछि लामो समयसम्म भुसालले आफू अध्ययनमै रहेको प्रतिक्रिया दिने गरेका थिए । पछिल्लो समय अर्थतन्त्रमा ठूलो संकुचन आउने सम्भावनाका बीच राष्ट्रिय आयमा कृषि क्षेत्रको योगदान बढ्ने हिसाबले नीति निर्माण तथा काम गरिरहेको भुसालले बताए ।

उनले यस्तो बेलामा स्वदेश फर्किने सबैका लागि रोजगारी सिर्जना गर्न राज्यका अन्य अंगहरूको पनि भूमिका हुने बताए ।

‘कृषि क्षेत्रले मात्र सबै धान्न सक्दैन । मैले चाहेर मात्र सबै हुँदैन,’ उनले भने, ‘भूमि सम्बन्धी व्यवस्थाका लागि अलग मन्त्रालय छ, आपूर्ति व्यवस्थाका लागि अलग, सहकारी अलग मन्त्रालयले हेर्छ भने लगानीका विषयमा फरक ठाउँबाट नीति निर्माण हुन्छन् । राज्यका सबै अंगहरूले मिलेर काम गर्ने हो भने अब रोजगारीको व्यवस्थापन सरल बन्न जाने देखिन्छ । त्यसका लागि प्रधानमन्त्रीकै तहबाट प्रतिबद्धता आउन जरुरी छ ।’

मन्त्री भुसालले किसानहरूको उत्थानका विषयमा ७० वर्षदेखि कुरा हुँदै आएको भएपनि कार्यान्वयन भने नभएको बताए । ‘सामन्तवादबाट मुक्त भएका किसानको उत्थानका लागि ७० वर्षदेखि कुरा उठिरहेको छ,’ उनले भने, ‘तर कार्यान्वयनको स्थिति भने छैन । यसपाली हामीले त्यसलाई फाइनल गर्ने ढंगबाट अघि बढ्ने सोच बनाएका छौं ।’

उनले साना किसानलाई तीन प्रतिशतसम्मको ब्याजमा ऋण दिने, मझौला र ठूला कृषि परियोजनाहरूलाई केही प्रतिशत ब्याजमा सब्सिडी दिने कुरा चलिरहेको बताए ।

‘किसानहरूले आफ्नो लागतमा २० प्रतिशत फाइदा जोडेर उत्पादित कृषिजन्य वस्तुहरू बेच्न पाउनुपर्छ भनेका छौं,’ मन्त्री भुसालले भने, ‘त्यसबाट कृषकको लगानी सुरक्षित हुनुका साथै कृषि उत्पादनमा देश आत्मनिर्भर हुने दिशातर्फ जान्छ । लाखौँ रोजगारी सिर्जना हुन्छ ।’