पेरुको एक पसलबाट जुत्ता चोर्ने चोरहरू हिस्स परेका छन् । 

हुआनकायो शहरको पसलमा तीनजना व्यक्तिले २०० वटा जुत्ता चोरेका थिए । तर ती सबै दाहिने गोडामा लगाउने जुत्ता मात्र थिए ।

पसलेले १३ हजार डलरभन्दा बढीको जुत्ता चोरिएको अनुमान गरेका छन् । तर चोरहरूलाई ती जुत्ता बेच्न मुश्किल परेको हुनुपर्छ । 

चोरीको यो प्रयास सीसीटीभी क्यामरामा कैद भएको छ । 

भिडियो फूटेजमा अपराधीहरूले मध्यरातमा पसलको शटरको ताल्चा फोरेको अनि विभिन्न ब्रान्डका जुत्ताका बाकस बोकेर हिँडेको देखिन्छ । 

स्थानीय प्रहरी प्रमुख एडुआन डियाजले पत्रकारहरूलाई बताए, ‘हामीले घटनास्थलबाट प्रमाण संकलन गरेका छौं । तर दाहिने गोडामा लगाउन मिल्ने जुत्ता मात्र चोरिएको छ । फूटेज र फिंगरप्रिन्टका आधारमा चोरहरूलाई हामी समात्नेछौं ।’