रेखा थापा महिला केन्द्रित फिल्म बनाउने अभिनेत्री हुन् । रेखाले आफ्ना फिल्ममा महिलालाई ‘हिरो’का रूपमा पेस गर्दै आएकी छन् । लंका, रावण, काली, हिम्मतवाली, रामप्यारी, रुद्रप्रिया त्यसका उदाहरण हुन् । अघिल्लो पटक त रेखाले जाजरकोटकी १५ वर्षीया किशोरीलाई शीर्ष भूमिका दिने आँट गर्दै ‘मालिका’ फिल्म निर्माण गरेकी थिइन् । उक्त फिल्म प्रदर्शनमा आएको ५ वर्षपछि रेखा निर्माण र अभिनयमा फर्किएकी छिन् । र, उनको निर्माण एवं अभिनय रहेको फिल्म ‘उपहार’ शुक्रवारबाट देशभरका सिनेमा हलमा प्रदर्शनमा आएको छ । 

यो मानिसको जीवनमा आउने उतारचढाव (अप्स एण्ड डाउन)को कथा हो । त्यसमा पनि साधारण युवतीलाई केन्द्रमा राखेर फिल्मको कथा भनिएको छ । ‘मुना’ नामक उक्त केन्द्रीय पात्रको भूमिकामा रेखा स्वयंमले अभिनय गरेकी छन् । जसमा उनलाई अन्य पात्रले साथ दिएका छन् । 

०००
सडकमा थर्मसमा चिया बेचेर गुजारा गर्ने मुनाको सपना छ – शहरमा आफ्नै चिया पसल खोल्ने । जसमा उनलाई ट्याक्सी चालक मदन (मुकुन भुसाल)ले हौसला दिएका हुन्छन् । मुना र मदन प्रेममा परिसकेका हुन्छन् । तर, कुनै एक घटनापछि मदन मुनासँग छुट्टिएर वैदेशिक रोजगारीमा जानुपर्ने परिस्थितिमा पुग्छन् । मदनको दुलही बन्ने सपना देखेकी मुना उनको प्रतिक्षामा कुरिबस्न बाध्य हुन्छिन् । 

मुनाले आफ्नो सपना पूरा गर्न कति संघर्ष गरेकी हुन्छिन् ? उनको जीवनमा के–कस्ता उतार चढावहरू आउँछन् ? मदनसँग उनको भेट कस्तो अवस्थामा हुन्छ ? मदनको दुलही बन्ने सपना पूरा हुन्छ कि हुँदैन् ? यस्ता प्रश्नहरूको जवाफ थाहा पाउन फिल्म नै हेर्नुपर्छ । 

फिल्ममा मुनासँग जोडिन आइपुग्ने दुई महिला पात्र छन् निशा (बेनिशा हमाल) र पूजा (पूजा शर्मा) । फरक फरक पृष्ठभूमिका यी दुई युवतीको पनि आ–आफ्नै कथा छ । फिल्ममा समर्पणजंग कार्की, तेज गिरी, शिशिर राणालगायत कलाकारहरू समेत शीर्ष भूमिकामा छन् । 

खासमा ‘उपहार’मा महिलाको संघर्षसँगै सक्षमतालाई देखाइएको छ । त्यस्तै, मानिसको सपना र भावनाको क्षयिकरण कसरी हुन्छ भन्ने कुरालाई समेत फिल्ममा पेस गरिएको छ । 

तीन जोडीको फरक–फरक खालको प्रेम कथा यसमा छ । युवापुस्ताको विदेश मोह, देशमा रोजगारीको अभावमा वैदेशिक रोजगारीमा जानुपर्ने बाध्यतासँगै वैदेशिक रोजगारीले दिएको पीडा, सडक व्यापारीको बाध्यतालगायत विषयलाई समेत फिल्मले उठाएको छ । फिल्मले दर्शकलाई कमेडीमार्फत् हसाउँदै कथा अगाडि बढाएको छ । पहिलो हाफमा हसाएको फिल्मले दोस्रो हाफमा इमोशनल बनाएको प्रतिक्रिया दर्शकले दिएका छन् । निर्देशक ज्ञानेन्द्र देउजाले फिल्मलाई हाँसो, रोदन, गीत–संगीत, द्वन्द्वलगायत कुराको प्याकेजिङ बनाएका छन् । 

निर्देशक देउजाले गत वर्षको हिट फिल्म ‘झिंगेदाउ’पछि ‘उपहार’ निर्देशन गरेका थिए । मानिसको जीवनमा कहिले खुशी आउँछ, कहिले दु:ख । कहिले सफलता मिल्छ, कहिले असफलता । यद्यपि, हरेश खानुहुन्न भन्ने सन्देश फिल्मले दिने प्रयास ‘उपहार’ गरेको गरेको फिल्म हेरेका दर्शकको प्रतिक्रिया छ । 

‘उपहार’भित्र केही कमी–कमजोरीहरू भने अवश्य छन् । मुख्य कमजोरी त फिल्म मनोरञ्जन हो भन्ने हाउगुजीले निर्देशक ज्ञानेन्द्र देउजालाई गाँजेको देखिन्छ । कथाले न्याय नपाएको भान फिल्म हेरिरहँदा गर्न सकिन्छ । केही संवाद नै नसुहाउने हुन कि लाग्छ । सुरुवाती गीतलाई बिनाप्रसँग राखिएको भान हुन्छ । कलाकारहरूको अभिनय औसत लाग्छ । यद्यपि, रेखा थापाले गर्भवती अवस्थामै यो फिल्मको सुटिङ गरेका कारण उनको अभिनय अलि असहज देखिएको हो कि भन्ने चाहिँ दर्शकलाई लाग्न लाग्छ । 

ट्वीस्ट जोड्न फिल्म केही असफल देखिएको छ । अब, के हुन्छ भन्ने कुरा धेरै ठाउँमा दर्शकले पहिल्यै अनुमान लगाउन सक्छन् । उसो त पोस्टर, टिजर र ट्रेलरमा ती कुराहरू पहिल्यै खुलेको भएर पनि ट्स्वीस्ट नलागेको हुनसक्छ । छायांकन, व्याकग्राउण्ड स्कोरले भने दर्शकको आँखा र कानलाई बिझाउँदैन । 

‘उपहार’लाई सुरक्षण भारतीले लेखेका हुन् । पटकथा तथा संवाद लेखनमा भने उनलाई अभिमन्यू निरवी र माधव शर्माले सघाएका हुन् । विष्णु घिमिरे ‘कल्पित’ छायांकार रहेको फिल्मको सम्पादक मित्रदेव गुरुङ हुन् । 

शुलभ प्रतिक र समीक्षा देउजा निर्माता रहेको फिल्मको कार्यकारी निर्मातामा रेखाका श्रीमान बलराम शाही ठकुरी छन् । शुक्रवार उत्साहजनक ओपनिङ गरेको फिल्मले शनिवार पनि बिहानैदेखि हलमा दर्शकको राम्रो साथ पाइरहेको निर्माण टिमको दाबी छ ।