प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल प्रचण्डले नेपाली कांग्रेसका सभापति शेरबहादुर देउवाको हठका कारण समीकरण बदल्नु परेको बताएका छन् । 

शुक्रवार पार्टी कार्यालय पेरिसडाँडामा बसेको स्थायी कमिटी बैठकमा प्रचण्डले देउवा हठ मुख्य जिम्मेवार रहेको बताएका हुन् । 

‘सरकारका काम प्रभावकारी बनाउन तीन–चार महिनाअघिदेखि नै मन्त्री परिवर्तन गरौं भन्दा कांग्रेस सभापति मान्दै मान्नुभएन । मुख्यगरी अर्थमन्त्री र परराष्ट्रमन्त्रीले सरकारका काममा सहयोग गरेनन्,’ प्रचण्डको ब्रिफिङ उद्धृृत गर्दै माओवादी केन्द्रका एक नेताले भने, ‘देउवाको हठबीच नेकपा (एमाले)का अध्यक्ष केपी ओलीको रियलाइजेनसनले पनि नयाँ समीकरण बन्ने बाटो खोल्यो ।’ नयाँ परिस्थितिलाई प्रचण्डले गठबन्धनभन्दा समीकरणको संज्ञा दिएको ती नेता बताउँछन् । 

प्रचण्डले पछिल्लो समीकरण सोचेरै बनाएकाले तत्काल केही नहुने पनि बताएका थिए । एमालेले यसपटक लचकता देखाएकाले नयाँ समीकरण लामै समय जाने ब्रिफिङ प्रचण्डले गरेको ती नेता बताए । 

माओवादीले विधान अधिवेशनले पारित गरेको विधानलाई केही परिमार्जनसहित अन्तिम रुप दिएको छ ।