नेकपा एमालेका प्रवक्ता प्रदीप ज्ञवालीले सहकारी मुद्दामा नेपाली कांग्रेस एकोहोरो गृहमन्त्री रवि लामिछानेमाथि खनिनु राजनीतिक प्रतिशोध भएको बताएका छन् ।

आइतवार पार्टी केन्द्रीय कार्यालयमा बसेको सचिवालय बैठकबारे सञ्चारकर्मीलाई ब्रिफिङ गर्दै उनले अहिले बनेको नयाँ सत्ता समीकरण देखेर कांग्रेस शक्ड भएकोसमेत बताए ।

'नेपाली कांग्रेसका साथीहरूले बेला मौकामा हसाउनुहुन्छ,' उनले भने, 'कांग्रेसले जे माग लिएर सदनमा अवरोध गरेको छ, यो तर्कसंगत भएन ।'

उनले सहकारीमा देखिएको समस्या समाधान गर्नुपर्ने विषयमा आफूहरू सहमत भएपनि कांग्रेसले एउटा व्यक्तिलाई निशाना बनाएकोले यसमा राजनीतिक प्रतिशोध देखिएको दाबी गरे ।

'यसको साङ्गोपाँगो अनुसन्धान गर्ने विषयमा सदनमा रहेका सबै दलहरू सहमत छन्,' उनले भने, 'तर कांग्रेसले एउटा व्यक्तिलाई निशाना बनाएर प्रतिशोध साँधेको छ । आफूले प्रधानमन्त्री प्रस्ताव गर्दा यो माग कहाँ हरायो, अर्को समीकरणमा आउनेबित्तिकै सदन नै चलन नदिने ?'

उनले नेपालको कानूनअनुसार कोही पनि दोषी प्रमाणित नहुने बेलासम्म निर्दोष हुने बताए । 'गृहमन्त्रीलाई सदनमा गएर बोल्छु भन्दा पनि रोक्ने,' उनले भने, 'सरकार डराएर भाग्यो भन्ने कुरा राजनीतिक प्रतिशोध हो ।'

उनले २० वर्षसम्म सत्तामा रहन्छु भनेर आशा गरेको कांग्रेस एकाएक सत्ताबाट हुत्तिनु पर्दा शक्ड भएको प्रतिक्रिया पनि दिए ।

उनले भने, 'सरकारबाट यसरी हटिन्छ भन्ने थाहा थिएन कांग्रेसलाई । २० वर्षसम्म सत्तामा हुने उहाँहरूको आशा थियो । उहाँहरू अहिले शक्ड हुनुहुन्छ ।'

बैठकबारे सञ्चारकर्मीलाई जानकारी दिँदै उनले आज बसेको सचिवालय बैठकमा संक्षेपमा पछिल्लो राजनीतिक अवस्थाबारे चर्चा गरेको बताए ।

'फागुन २१ गते सत्ता समीकरणलाई लिएर पनि हामीबीच छलफल भयो,' प्रवक्ता ज्ञवालीले भने, 'समग्रमा अहिले बनेको गठबन्धन सकारात्मक छ । देश फस्दै गएको थियो, यसले सही दिशातिर ल्याउन सफल भएको छ ।'

उनले अहिलेको गठबन्धनले राष्ट्रिय स्वाधीनताको रक्षा गर्ने, भ्रष्टाचारविरुद्ध अभियान प्रभावकारी रूपमा लैजाने अहिलेको निराशालाई चिर्ने गरी काम गरिरहेको दाबीसमेत गरे ।  

'अझ बढी सरकारले जनतालाई विश्वास दिलाउने काम गरोस्, अझ गति लेओस् भन्ने अपेक्षा छ,' उनले भने ।

उनले आगामी वैशाख ८ गते दशौँ महाधिवेशनका प्रतिनिधिहरूको बैठक बोलाइएको बताए । 'दशौँ महाधिवेशनमा सहभागी डेलिगेट्स आउने, ५ वर्षका लागि भ्यालिडेट गर्ने, समीक्षा गर्ने । विधान महाधिवेशन पनि डेलिगेट्सले नै गर्ने निर्णय भएको छ,' उनले भने ।

दशौँ महाधिवेशनमा २१ सय ५३ प्रतिनिधि सहभागी थिए । प्रवक्ता ज्ञवालीले एमालेलाई निर्णायक राष्ट्रिय शक्ति बनाउने गरी काम गर्न लागिएको बताए ।