नेपाली कांग्रेसका महामन्त्री गगन थापाले संचालन गरेको संवाद यात्राप्रति सर्वसाधारण जनताले चासो दिएका छन् ।

शनिवार बाँकेबाट शुरु भएको संवाद यात्राको तेस्रो चरणको कार्यक्रममा आइतवार बाँके र बर्दियामा स्थानीयले गगनसँग प्रश्न गरेका हुन् । 

बिहान खजुरामा सभा गरेर गगनले संवाद यात्रा शुरु गरेका थिए । ‘संवाद यात्राको यस चरणको दोस्रो दिन आज दिनभर बाँके र बर्दियाको हुलाकी राजमार्ग आसपासका विभिन्न स्थानमा उद्योगी व्यवसायीसँग व्यवसायीक लगानी ऋण र व्यवस्थापनका कुरा, किसानसँग मल बिउ र मूल्यको कुरा, शिक्षक विद्यार्थी अभिभावकसँग शिक्षाको गुणस्तरको कुरा, भूमि र सुकुम्बासीका कुरा, वन वातावरण र जैविक विविधताका कुरा,पूर्वाधार विकास र ढिलासुस्तीको कुरा भएको छ’ थापाले सामाजिक सञ्जालमा लेखेका छन् । 

उनले आइतवार नै सुशील कोइराला प्रखर क्यान्सर अस्पतालको अवलोकन गरी जनशक्ति, पूर्वाधार र सेवा प्रवाहको अवस्थाका बारेमा छलफल गरेका थिए । ‘पार्टीका साथीसँग सदस्यता,नेतृत्व चयन र व्यवस्थापनबारे छलफल गर्‍यौं । संवादका क्रममा जनताका अपेक्षा र सुझाव लिएका छौँ’ थापाले भने । 

गगनले शुरु गरेको संवाद यात्रामा कांग्रेस कार्यकर्ताका अतिरिक्त सर्वसाधारणले समेत सहभागिता जनाएका छन् । झापाबाट शुरु गरेको उनको यात्रा कञ्चनपुरमा पुगेर टुंगिने छ ।