रुपन्देहीको बुटवल–भैरहवा ‘सिक्स लेन’ सडक खण्डको दायाँ-बायाँका रुख काटछाँट गरिएको छ ।

हरियाली, शीतलता र छहारी चाहिने गर्मीको समयमा तिलोत्तमा नगरपालिका भित्र पर्ने योगीकुटीदेखि नयाँ मिलसम्मका रुख बेमौषममा ‘थिनिङ’ गरिँदा पालिकाको चर्को आलोचना भएको छ ।

सडकलाई सुन्दर बनाएका रुख वसन्तको पालुवामै निमोठिएपछि स्थानीयले नगरपालिकाको कार्यप्रति असन्तुष्टि पोखेका छन् ।

तिलोत्तमा नगरपालिकाका वातावरण अधिकृत गोरख खनालले ठूला र अग्ला रुखलाई एउटै साइजमा ल्याउने गरी कटान गरिएको बताए ।

‘काटछाँट गर्न केही दिन ढिलाई भएको पक्कै हो’, खनालले भने, ‘हामीले गलत नियतले रुख काटिएको होइन । हेर्दा राम्रो र आहा हुने गरी सबै रुख एउटै साइजमा बनाउन थिनिङ गरिएको हो । यसलाई अन्यथा लिन भएन ।’

स्टोनिया, वरपिपल, स्वामी, छतिवन, नीमलगायतका रुख काटिएका छन् ।

वातावरण क्षेत्रका जानकार युवराज कँडेलले गलत सिजनमा रुख विरुवा काटिएको बताए । ‘यि रुखहरू माघ वा फागुन महिनामा काट्नुपर्ने उनको भनाइ छ ।

अहिले काटेर सौन्दर्यीकरणमा ध्यान नदिइएको उनले बताए । 'सुपरिवेक्षण नगरी रुख काटिएका छन्, यसलाई रुखमा समस्या ल्याउँछ’, कँडेलले भने । 

तिलोत्तमा नगरपालिकाका पूर्वमेयर तथा एमाले सांसद वासुदेव घिमिरेले बेसिजनमा रुखहरू काटिएको आक्रोश पोखेका छन् ।

उनले सामाजिक सञ्जालमा लेखेका छन, ‘सुझबुझ कत्ति पनि देखिएन । हुर्काउन गाह्रो छ । तर छपछप गिँड्न सजिलो रहेछ । काटछाँट भनौं भने पनि यो धुपको समय उपयुक्त हुँदैहोइन ।’

घिमिरेको पालामा तिलोत्तमा हरियाली प्रवर्द्धन कार्यक्रम अघि बढेको थियो । बुटवल भैरहवा सडकको दायाँबायाँको हरियाली लोभलाग्दो छ ।