सुदूरपश्चिम प्रदेशको मुख्यमन्त्रीमा नेकपा एमालेले नेकपा एसका दीर्घ सोडारीलाई समर्थन गर्ने भएको छ ।

केन्द्रबाट ’सिग्नल’ आएपछि एमालेले नेकपा एसका संसदीय दलका नेता सोडारीलाई समर्थन गरेको हो ।

एमालेले समर्थन गरेपछि सोडारीले मुख्यमन्त्रीमा दाबी पेश गर्ने तयारी गरेका छन् ।

एमाले, माओवादी नेकपा एस र नाउपाको रन्जिता पक्षका सांसदको समर्थनमा सोडारीले बिहीवार नै मुख्यमन्त्रीमा दाबी पेश गर्ने तयारी गरेका हुन् । नाउभित्रको विवादले मुख्यमन्त्री नेकपा एसको पेल्टामा गएपनि दीर्घ सोडारीलाई मुख्यमन्त्रीमा समर्थन गर्न नसकिने एमालेले अडान लिएको थियो ।

मुख्यमन्त्रीका लागि दाबी पेश गर्ने अन्तिम दिन बिहीवार एमालेका अध्यक्ष केपी शर्मा ओली, प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल प्रचण्ड र नेकपा एसका अध्यक्ष माधवकुमार नेपालबीचको छलफलमा सोडारीकै नाममा सहमति जुटेपछि एमालेले पनि मुख्यमन्त्रीमा उनलाई सघाउने भएको हो ।

'केन्द्रको निर्देशनपछि हामीले मुख्यमन्त्रीमा सोडारीलाई समर्थन गरेका छौं।  यसअघि पनि हामीबीच विवाद थिएन । केन्द्रमा छलफल भइरहेको विषय भएको हुनाले यसमा हामी बोलेका थिएनौं । केन्द्रबाटै निर्णय भएपछि त्यहीअनुरूप हामी अगाडि बढ्दैछौँ, एमाले सुदूरपश्चिम प्रदेशसभा संसदीय दलका नेता राजेन्द्र रावलले भने।