सिन्धुपाल्चोकमा जन्ती बोकेको बस दुर्घटना हुँदा तीन जनाको मृत्यु भएको छ । दोलखाबाट जन्ती लिएर सिन्धुपाल्चोक आउँदै गरेको रोल्वालिङ यातायातको बा ४ ख ५६१६ नम्बरको बस त्रिपुरासुन्दरी गाउँपालिका-५ धारावतीमाआज बिहान दुर्घटना हुँदा तीन जनाको घटनास्थलमै ज्यान गएको प्रहरीले जनाएको छ । 

जिल्ला प्रहरी कार्यालय सिन्धुपाल्चोकका प्रवक्ता डीएसपी निरन्जन भट्टराईका अनुसार दुर्घटनामा ५२ जना घाइते भएका छन् । घाइतमध्ये ७/८ जनाको अवस्था गम्भीर रहेको डीएसपी भट्टराईले लोकान्तरलाई जानकारी दिए । उनका अनुसार घाइतेको बाह्रबिसे अस्पतालमा उपचार भइरहेको छ । 

बसमा ५५ जना सवार थिए । बस ठूलो भिरबाट खसेको र भौगोलिक अवस्था कठिन भएकाले उद्धार कार्यमा समस्या परेको उनले बताए ।