अढाइ वर्षकी बालिकालाई भारतको सिलगुढी पुर्याएर बिक्री गरेको आरोपमा प्रहरीले एक महिलालाई पक्राउ गरेको छ । पक्राउ पर्नेमा ललितपुर गोदावरी घर भएर काठमाडौं जडिबुटीमा डेरा गरीबस्ने उर्मिला भनिने कल्पना विश्वकर्मा छिन् । 

मानव बेचबिखन अनुसन्धान ब्युरोका अनुसार विश्वकर्माले आर्थिक अवस्था कमजोर भएकी ती बालिकाको अभिभावकलाई ललाइफकाइ गरेर भारतको सिलगुढी पुर्याएकी थिइन् । गत चैन २९ गते विश्वकर्मा मकवानपुरमै पुगेकी थिइन् । ‘तिमीहरूको आर्थिक अवस्था कमजोर छ, छोरीलाई काठमाडौंमा पढाएर ठूलो मान्छे बनाइदिन्छु, काठमाडौंमा पढाउने संस्थाहरू छन्’ भन्दै विश्वकर्माले बालिकालाई घरबाट लिएर गएको प्रहरी अनुसन्धानबाट खुलेको छ । विश्वकर्माले ती बालिकालाई ‘डाक्टर र पाइलट बन्छिन्’ भन्दै परिवारलाई फकाएकी थिइन् । 

परिवारबाट बालिकालाई लिएर गएपछि विश्वकर्माले चार दिनसम्म काठमाडौंस्थित डेरामा ल्याएर राखेकी थिइन् । ब्युरोका प्रवक्ता एसपी ज्ञानेन्द्रप्रसाद फुयालका अनुसार विश्वकर्माले बालिकालाई बिक्री गर्ने उद्देश्यले भारतको सिलगुढी पुर्याएकी थिइन् । ‘अचम्म कुरा त बालिकालाई विश्वकर्माले सिलगुढीस्थित साथीलाई जिम्मा लगाएपछि उनको परिवारलाई संस्थाले पठाएको भन्दै आईएमई गरेर २० हजार पठाएका पाइयो,’ फुयालले भने,‘ बालिकालाई मकवानपुर प्रहरी र अन्य उद्धार संस्थाको सहयोगमा वैशाख १० गते उद्धार गरियो ।’ 

ब्युरोले मानव बेखबिखन तथा ओसारपसार मुद्दामा विश्वकर्माविरुद्ध अनुसन्धान गर्न जिल्ला अदालत काठमाडौंबाट सात दिनको थुना अनुमति लिएको छ । बालिकालाई हाल सुरक्षित आवास गृहमा राखिएको ब्युरोले जनाएको छ ।