विराटनगर, १८ वैशाख– गत माघ पहिलो साता त्रिभुवन अन्तर्राष्ट्रिय विमानस्थलबाट भित्रिएर बेपात्ता भएको भनिएको ३३ किलो सुन र त्योसँगै जोडिएको सनम शाक्य हत्याकाण्डको छानवीनका लागि अहिले २८ जना मोरङ प्रहरीको हिरासतमा छन् । 

प्रहरीले हिरासतमा रहेका सबैसँग बयान लिएर अनुसन्धान प्रतिवेदन जिल्ला सरकारी वकिलको कार्यालय मोरङलाई बुझाइसकेको छ । सरकारी वकिल कार्यालयका अधिकारी अहिले २८ जनाविरुद्ध मुद्दा दर्ता गर्न अभियोग पत्र तयार गरिरहेको छ । 

१३ जना एयरलाइन्सका कर्मचारी 

सुन तस्करीमा संलग्न रहेको भन्दै प्रहरीले बिभिन्न एयरलाइन्सका १३ जना कर्मचारीलाई हिरासतमा राखेको छ । यसरी प्रहरी हिरासतमा रहेका १३ जनाविरुद्ध संगठित अपराधअन्तर्गत मुद्दा चलाउने तयारी भइरहेको छ । 

प्रहरी हिरासतमा रहेका एयरलाइन्सका कर्मचारीमा एलबी मगर, हेमन्त गौतम, बिरेन्द्रमान श्रेष्ठ, समिर प्रसाद तोलाङ्गी, बालकृष्ण श्रेष्ठ, दोरन खत्री, कपिलराम पुरी, गोपाल श्रेष्ठ, पुण्य प्रसाद लामा, राजन थापा, राजु महर्जन, अमरमान डंगोल र तुलाराम थारु रहेका छन् । 

प्रहरी अधिकारीविरुद्ध संगठित अपराधको मुद्दा
३३ किलो सुन तस्करी र सनम शाक्य हत्या प्रकरणमा अहिले ६ जना प्रहरी कर्मचारी हिरासतमा छन् । पूर्व डिआईजीदेखि बहालवाला एसपी, डिएसपी, सई र प्रहरी जवान समेत प्रहरी हिरासतमा छन्  । उनीहरुविरुद्ध बुधवार जिल्ला अदालतमा मुद्दा चलाउने तयारी भइरहेको छ । सुन तस्करीमा संलग्न तथा हत्याको आरोपमा अनुसन्धानमा तानिएका प्रहरीहरुमा पूर्व डिआईजी गोबिन्द निरौला, बहालवाला एसपी विकासराज खनाल, डिएसपी सञ्जय राउत र प्रजित केसी,  सई बालकृष्ण सञ्जेल र प्रहरी जवान विष्णुप्रसाद खड्का रहेका छन् । प्रहरी हिरासतमा रहेका उनीहरुलाई सुन तस्करी सहयोगी तथा संगठित अपराध अन्तर्गत मुद्दा चलाउने तयारी छ । 

एउटै व्यक्तिलाई ४ वटासम्म मुद्दा लाग्ने

जिल्ला प्रहरी कार्यालयको हिरासतमा राखिएका प्रहरी अधिकृतहरुलाई दुईवटा मुद्दा लगाउने तयारी भईरहँदा घटनासँग प्रत्यक्ष जोडिएका ब्यक्तिका हकमा भने सुन तस्करी, संगठित अपराध, कर्तब्य ज्यान र अपहरण मुद्दा लगाउने तयारी भईरहेको छ ।  

घटनामा सिधै जोडिएका मोहन काफ्ले, नरेन्द्र कार्की, लाक्पा शेर्पा, टेकराज मल्ल ठकुरीलाई चारवटा मुद्दा लगाउने तयारी भइरहेको प्रहरीले जनाएको छ । त्यस्तै घटनाका योजनाकार तथा सुन तस्करका नाइके चूडामणि उप्रेती (गोरे)विरुद्ध पनि चारवटा मुद्दा दर्ता गरिने तयारी छन् । गोरे भने अहिलेसम्म पनि फरार छन् भने अन्य ४ जना हिरासतमा छन् । 

गत फागुन १८ गते सनम शाक्यको शव विराटनगर–३ मा लुकाएर भारत तर्फ लैजाँदै गरेको अबस्थामा काफ्ले, मल्लठकुरी र कार्कीलाई प्रहरीले घटना स्थलबाट शव सहित पक्राउ गरेको थियो । हत्या गरिएका सनम शाक्यको सव  स्करपीयोभित्र फेला परेको थियो । 

मोरङको उर्लाबारी घर भएका शाक्यको हत्या पछि चर्चामा आएको ३३ किलो सुन प्रकरणमा प्रहरीकै संलग्नता भएको आशंकामा गृहमन्त्रालयले छानवीन समिति गठन गरेको थियो । छानवीन समिति गठन भएपछि ३८ जना विरुद्ध अनुसन्धान प्रकृया अघि बढाइएको बताइन्छ । तर फरार रहेका अन्य ब्यक्तिको खोजी भइरहेको प्रहरीले जनाएको छ ।