काठमाडौं – भेनेजुएलाका राष्ट्रपति निकोलस मडुरोले ३० दिनसम्म नियन्त्रित रूपमा बिजुली आपूर्ति गर्ने घोषणा आइतवार गरेका छन् । त्यसअघि उनको सरकारले देशमा विद्युत् आपूर्ति नभएका कारण अफिसको कामकै समयमा बिजुली काटिने र विद्यालयहरूको छुट्टी बढाइने जनाएको थियो । 

यसैबीच भेनेजुएलाका क्रुद्ध नागरिकले बिजुली र पानी काटिएपछि राजधानी काराकासका सडकमा प्रदर्शन गरेका छन् । 

पर्याप्त बिजुली नभएका कारण सरकारले कठोर उपाय अपनाउन लागेको हो । मार्च महिनामा त्यहाँ बारम्बार बिजुली काटियो । देशमा पहिलेदेखि नै खराब अर्थव्यवस्थाका कारण रहनसहनमा समस्या देखिएको स्थितिमा बिजुली काटिँदा झनै खराब असर परेको छ । 

राष्ट्रपति मडुरो र विपक्षी नेता खुआज गुआइडोबीच राजनीतिक भिडन्त कायमै रहँदा यो संकट आएको हो । 

गुआइडोलाई अमेरिका र ५० भन्दा बढी देशले अन्तरिम राष्ट्रपतिका रूपमा मान्यता दिएका छन् । 

सरकारी टीभीमा कुराकानी गर्दै मडुरोले बिजुलीका लागि ३० दिनको योजनालाई अनुमति दिइएको बताए । यसको विस्तृत विवरण उनले दिएनन् । 

तर खानेपानी आपूर्तिको प्रत्याभूतिका विषयमा जोड दिइने उनले बताए । जर्जर संरचना, बिजुलीको ग्रिडमा कम लगानी र उचित रेखदेखके अभावका कारण देशमा बिजुली संकट आएको हो । 

बिजुली कम भएका कारण भेनेजुएलाले विद्यालयका गतिविधि बन्द गर्ने अनि सरकारी तथा निजी संस्थामा दुई बजेसम्मको कार्यालय समय बनाउने निर्णय लिएको सञ्चारमन्त्री जर्ज रोड्रिगेजले बताए ।

एजेन्सी