काठमाडौं, ४ फागुन- दयाहाङ राई अभिनित चलचित्र मिस्टर झोलेले ६ दिनमा २ करोड ४८ लाख ग्रस कलेक्सन गरेको छ । निर्माताले बिहीबार पत्रकार सम्मेलन गर्दै ६ दिनको कमाई सार्वजनिक गरेका हुन् । 

काठमाडौंबाट १ करोड ४५ लाख र मोफसलबाट १ करोड ३ लाख ग्रस कलेक्सन गरेको विवरण निर्माता टेकेन खड्काले पेश गरे । फिल्म १ करोड ५३ लाखको लगानीमा बनेको निर्माण पक्षले जनाएको छ ।

‘दोस्रो सातामा पनि हामीले राम्रो शोहरु प्राप्त गरेका छौं,’ खड्काले भने, ‘हङकङसहित विदेशबाटसमेत राम्रो रेस्पोन्स पाएका छौं। अष्ट्रेलिया, जापान, दक्षिण कोरियामा समेत स्क्रिन हुँदैछ ।’

निर्देशक रामबाबु गुरुङले आलोचनातर्फ लक्षित गर्दै कतिपय दर्शक सन्तुष्ट नभएको स्वीकारे । ‘क्रिटिक्सले घच्घच्याउनु भएको हो भन्ने रुपमा लिएको छु,’ उनले भने, ‘तर, हामीले खोजेजस्तो बनाउन सकेका छौं भन्ने लाग्छ ।’

अभिनेता दयाहाङ राईलाई पत्रकारले ब्याक टु ब्याक फिल्म किन खेल्नुभएको भनेर जिज्ञासा राखेका थिए । जवाफमा उनले भने, ‘यसवर्ष निश्चित उद्देश्यका लागि फिल्म खेलेको थिएँ । त्यो उद्देश्यपछि भनौंला । मेक्सिमम फिल्म खेल्ने उद्देश्य पनि थियो । समय, टीम र फिल्म मन परे खेलौँ भन्ने लागेको छ ।’

निर्माता खड्काका अनुसार शुक्रबारदेखि राम्र्रै शोसहित फिल्म दोस्रो सातामा प्रदर्शन हुँदैछ । निर्माताले सफलताका लागि मिडियालाई धन्यवाद दिनभन्दै पत्रकार सम्मेलन गरेका थिए ।