धनगढी, ३ फागुन– प्रदेश नंं. ७ को मुख्यमन्त्रीमा नेकपा माओवादी केन्द्र का नेता त्रिलोचन भट्ट नियुक्त भएका छन् । 

प्रदेश प्रमुख मोहनराज मल्लले प्रदेश संसदीय दलका नेतासमेत रहेका भट्टलाई आज नियुक्त गरेका हुन् । प्रदेश प्रमुख मल्लले मध्यान्ह १२ बजे भट्टलाई मुख्यमन्त्रीमा नियुक्त गरेको प्रमाणपत्र हस्तान्तरण गरे ।
मुख्यमन्त्रीको नियुक्ति आज भएपनि शपथ ग्रहण भने फागुन ५ गते दिउँसो ३ बजे हुने प्रदेश प्रमुखको कार्यालयका उपसचिव हिरालाल चौधरीले जानकारी दिए । जसको लागि आवश्यक तयारी पनि सुरु गरेको उपसचिव चौधरीले बताए ।

निर्वाचन आयोगले मतपरिणाम बुझाएको एक महिनाभित्रै मुख्यमन्त्री नियुक्त गरिसक्नुपर्ने संवैधानिक व्यवस्था छ । फागुन ५ गते आयोगले मतपरिणाम बुझाएको एक महिना पुग्दैछ । जुन बाध्यतात्मक व्यवस्था अनुसार नियुक्त गरिएको हो । फागुन ४ गते सूर्य ग्रहण लाग्ने हुँदा जसलाई छलेर पनि एक दिनपछि शपथ ग्रहणको समय निर्धारण गरेको उपसचिव चौधरीले जनाए ।

को हुन् त्रिचोचन भट्ट ?

डोटी जिल्लाको साविक भूमिराजमाण्डौ गाविस वाड नं ८ फलेडीका ४८ वर्षीय मुख्यमन्त्री भट्ट बुवा प्रसाद भट्ट र आमा सारदा भट्टको साहिलो छोरा हुन ।

नेकपा माओवादी केन्द्रका पोलिटब्यूरो सदस्य समेत रहेका भट्ट कमजोर पारिवारिक अवस्थाकै कारण ८ कक्षाको पढाई छोडेर १४ बर्षकै उमेरमा कामको खोजीमा भारत पसेका थिए ।

भारतको पञ्जावमा ५ वर्ष र मुम्बईमा १२ वर्ष गरी १७ वर्षसम्म चौकीदार (सेक्युरिटी गार्ड) का रूपमा काम गरेका भट्ट २०४७ सालबाट अखिल भारत नेपाल एकता समाजको सदस्यबाट राजनीति सुरु गरेका हुन् ।

माओवादी जनयुद्धको तयारी तथा प्रवासबाट गरिने बिभिन्न व्यवस्थापकीय पक्षमा सहयोग गर्दै आएका भट्ट २०५६ सालबाट कम्पनीको जागिर छोडेर पूर्णकालिन राजनीतिमा होमिए । २०५६ पछि उनी प्रवासबाटै जिल्ला कमिटी डोटीको सदस्य तथा क्षेत्रीय ब्यूरो सदस्य बने । २०५८ सालबाट त्रिलोचन भट्ट माहाराष्ट्र मुम्बैको नेपाली जनअधिकार सुरक्षा समितिमा रहेर काम गरेका थिए ।

२०६१ सालमा पार्टीले उनलाई नेपालमा पठाउने निर्णय गरेपछि उनी नेपाल फर्किएर भूमिगत भएर काम गर्न थाले । २०६२ सालमा माओवादीको डोटी जिल्ला सचिव रहेका त्रिलोचन भट्ट २०६३ मा डोटी जिल्ला सह इन्चार्ज भए ।
२०६४ मा जिल्ला इन्चार्जको जिम्मेवारी पाएका उनी २०७१ देखि हालसम्म नेकपा माओवादी केन्द्रका जिल्ला अध्यक्ष तथा पोलिटब्यूरो सदस्य रहेका छन् ।

२०६४ सालको संविधानसभा निर्वाचनमा डोटी क्षेत्र नं १ बाट चुनाव लडेका भट्ट २०७० सालमा दोश्रो संविधानसभा निर्वाचनमा डोटी क्षेत्र नं २ बाट चुनाव लडेका थिए । दुुबै निर्वाचनमा हार ब्यहोरेका भट्ट यस पटक बामगठवन्धनको तर्फबाट डोटी प्रदेश सभा निर्वाचन क्षेत्र नं २ बाट नेपाली कांग्रेसका उम्मेदबार योगेन्द्र शाहीलाई २७ सय मतान्तरले पराजित गर्दै बिजयी भए ।