काठमाडौं, १३ फागुन- नेपाल मेडिकल काउन्सिलले थापाथलीस्थित नर्भिक इन्टरनेसनल अस्पतालमा बायाँ खुट्टाको शल्यक्रिया गर्नुपर्नेमा दायाँ खुट्टाको गर्ने चिकित्सकलाई कारबाही हुने बताएको छ ।

उपचारमा संलग्न चिकित्सक प्रविण नेपाललाई स्पष्टिकरणका लागि बोलाएको जानकारी दिँदै काउन्सिलले सोही आधारमा कारबाही गर्ने जनाएको छ । राजधानी आइतबार आयोजित कार्यक्रममा उपस्थित काउन्सिलका सदस्य डुण्डीराज पौडेलले उपचारमा भएको लापरबाहीप्रति दुःख व्यक्त गर्दै दोषीमाथि तत्काल कारबाही हुने बताए ।

उनका अनुसार काउन्सिलले दोषी चिकित्सकलाई आगामी मंगलबार स्पष्टिकरणका लागि बोलाएको छ ।

बायाँ खुट्टामा समस्या आएपछि उपचारका लागि शुक्रबार राजधानीको नर्भिक अस्पतालमा पुगेकी चितवनकी ३८ वर्षीया विन्दु पौडेलको बायाँ खुट्टाको शल्यक्रिया गर्नुपर्नेमा दायाँ खुट्टाको गरिएपछि तनाव भएको थियो ।

शनिवार बिरामी पक्षले विरोध जनाएपछि अस्पताल प्रशासनले यस घटनालाई मानवीय त्रुटि भन्दै बिरामीको उपचारमा लागेको सम्पूर्ण खर्चका साथै थप उपचार गर्नुपर्दा लाग्ने सबै खर्च व्यहोर्ने प्रतिबद्धता जनाएको थियो ।