काठमाडौं –चिकित्सा शिक्षा क्षेत्रमा देखिएका विकृति अन्त्यका लागि जुम्लामा गएर आमरण अनशनमा बसेका त्रिवि शिक्षण अस्पतालका डा. गोविन्द केसीको असहमतिका बीच सरकारले राष्ट्रिय चिकित्सा शिक्षा विधेयक संसदमा पेश गर्ने तयारी गरेको छ ।

सोमवार दिउँसो बस्ने प्रतिनिधिसभाको बैठकमा विधेयक टेबुल गर्ने कार्यसूची रहेको संसद सचिवालले जनाएको छ । आइतवार नै सो विधेयक संसदमा पेश गर्ने तयारी भए पनि नेकपाका पूर्वसांसद मोहमद मुस्तक आलमको निधनमा शोक प्रस्ताव पारित गर्ने कार्यसूचीका कारण विधेयक टेबुल हुन सकेको थिएन ।

डा. केसीसँग वार्ता प्रक्रिया अगाडि बढाउने र सहमतिका आधारमा विधेयक संशोधन गर्न सकिने सरकारको भनाइ छ । शिक्षामन्त्री गिरिराजमणि पोखरेलले प्रमुख प्रतिपक्षी दल नेपाली कांग्रेससँगको सहमतिकै आधारमा चिकित्सा शिक्षा विधेयक अगाडि बढ्ने आइतवार बताएका थिए ।

सरकारले संसद सचिवालयमा दर्ता गरेको विधेयक फिर्ता नलिने मन्त्री पोखरेलले बताइसकेका छन् । चिकित्सा शिक्षा विधेयक संसदको कार्यसूचीमा चढ्दै र हट्दै आइरहेको छ ।

सोमवारको बैठकमा विधेयक पेश हुने सम्भावना रहेको नेकपाकी प्रमुख सचेतक शान्ता चौधरीले जानकारी दिइन् ।

कांग्रेससँग सहमति गरेर द्रुतमार्गबाट विधेयक पारित गर्ने सरकारको योजना रहेको शिक्षामन्त्री पोखरेलले बताएका छन् ।

चिकित्सा शिक्षा क्षेत्रमा देखिएका विकृति अन्त्यका लागि १६ दिनदेखि जुम्लामा गएर आमरण अनशनमा बसेका त्रिवि शिक्षण अस्पतालका प्राध्यापक डा. केसीको स्वास्थ्य अवस्था कमजोर बन्दै गएको छ ।

प्रमुख प्रतिपक्षी दल नेपाली कांग्रेसले भने पूर्ववर्ती शेरबहादुर देउवा सरकारले ल्याएको अध्यादेश अनुसार नै विधेयक ल्याउनु पर्ने बताउँदै आएको छ ।

डा. केसीको माग सम्बोधन गर्ने विषयमा सत्तारुढ नेकपाका प्रवक्ता नारायणकाजी श्रेष्ठले डा. केसीका प्रतिनिधिसँग आइतवार वार्ता गरेका थिए ।

सरकारले वार्ता टोली बनाएर डा. केसीका प्रतिनिधिसँग वार्ता गर्ने भनिए पनि वार्ता टोली गठन हुन सकेको छैन ।

सरकारले डा. केसीलाई काठमाडौंमा ल्याएर उपचार गर्न आग्रह गरे पनि उनले माग पूरा नभएसम्म काठमाडौं नआउने अडान राखेका छन् ।