जनकपुरधाम – सिरहाको लहानस्थित मारवाडी सेवा सदनमा सीके राउतको कार्यक्रमस्थलमा यूएनको गाडी देखिएको सम्बन्धी समाचारमा प्रतिक्रिया जनाउँदै यूएनका प्रतिनिधिले संयोग मात्र भएको जनाएका छन् ।

सीके राउतको बैठकस्थलमा यूएनको गाडी र प्रतिनिधि हुनु संयोग मात्र रहेको प्रतिनिधि भगवान ठाकुरले बताए ।

‘सीके राउतको कार्यक्रम त्यहाँ छ भन्ने कुरा हामीलाई थाहा थिएन,’ यूएनका प्रतिनिधि ठाकुरले भने, ‘हाम्रो एउटा गाडी र चालक त्यहाँ बास मात्र बसेको हो ।’ संयुक्त राष्ट्रसंघको खाद्य तथा कृषि संगठन अन्तर्गत जलवायू परिवर्तनमा काम गर्ने सिलसिलामा फिल्डमा खटिएको बेला बास बस्ने क्रममा संयोग मात्र परेको उनले प्रतिक्रिया दिए ।

‘म एउटा गाडी लिएर आफैं त्यहाँको गोदुली होटेलमा बस्दै आएको थिएँ,’ ठाकुरले भने, ‘तर त्यहाँ अर्को कोठा नभएपछि गाडी र गाडीको चालक उत्तरकुमार श्रेष्ठ मारवाडी सेवा सदनमा बास बसेका हुन् ।’

सिरहा, उदयपुर, कपिलवस्तु र अर्घाखाँची गरी ४ जिल्लामा आफूहरू काम गर्दै आएको बताउँदै ठाकुरले भने, ‘हामी ५ दिन पहिले नै यहाँ आयौं, दिनमा फिल्डमा खटिने र राति मात्र होटेलमा बास बस्दै आएका थियौं ।’ विगत लामो समयसम्म राष्ट्रिय अखण्डता विरोधी अभियान सञ्चालन गरेका सीके राउतको बैठकस्थलमा यूएनको गाडी देखिएपछि स्थानीयले शंकास्पद दृष्टिले हेरेका थिए ।

‘सीके राउतसँग गोप्य भेटघाट गर्ने कुनै पनि नियतले त्यहाँ गएको होइन र भेटघाट पनि गरिएन,’ ठाकुरले भने, ‘राउतको कार्यक्रमस्थलमा हाम्रो बास हुनु संयोग मात्र हो ।’ गाडीका चालक उत्तरकुमार श्रेष्ठले सीके राउतको कार्यक्रम त्यहाँ हुन्छ भन्ने केही पनि थाहा नभएको बताए ।