नयाँदिल्ली– इण्डियन प्रिमियर लिग (आईपीएल)को १२ औं संस्करण शनिबारदेखि शुरु हुँदैछ । उद्घाटन खेलमा साबिकको विजेता चेन्नई सुपर किङ्स र रोयल च्यालेन्जर्स बैंगलोरबीच प्रतिस्पर्धा हुने भएको छ । चेन्नई र बैंगलोरबीचको उद्घाटन खेल नेपाली समय अनुसार राति ८ः१५ मा शुरु हुनेछ ।

बैंगलोर भारतीय कप्तान विराट कोहलीको कप्तानीमा र चेन्नई पूर्वकप्तान महेन्द्र सिंह धोनीको कप्तानीमा मैदान उत्रने छन् । चेन्नईस्थित एम ए  चितम्बरम स्टेडियममा खेल हुने छ । खेलको नतिजा बलर र बलरको दबाब सामना गर्ने क्षमतामा निर्भर गर्नेछ । दुवै टोली जित निकाल्दै सुखद शुरुवात गर्न चाहन्छ । 

भारतीय क्रिकेट बोर्डले आयोजना गर्ने आईपीएलमा ८ टोलीले प्रतिस्पर्धा गर्ने छन् । डबल राउण्ड रोबिन लिगको आधारमा संचालन हुने लिगको शीर्ष चार टोलीले प्ले अफमा स्थान बनाउने छन् । आईपीएलमा यस सिजनमा चेन्नई सुपर किङ्स, सनराईजर्स हैदरावाद, रोयल च्यालेंजर्स बैंगलोर, दिल्ली क्यापिटल्स, राजेस्थान रोयल्स, किंग्स इलाभेन पन्जाब, कलकता नाइटराइडर्स र मुम्बई इन्डियन्स रहेका छन् ।

नेपाली राष्ट्रिय टोलीका लेग स्पिनर सन्दीप लामिछाने सम्मिलित दिल्ली क्यापिटल्सले  आइतबार पहिलो खेल मुम्बई ईण्डियन्ससंग खेल्नेछ ।