काठमाडौं- सलिनमान बनिया स्टारर फिल्म ‘यात्रा: अ म्युजिकल भ्लग’ आउँदो शुक्रबारबाट प्रदर्शनमा आउँदैछ । 

फिल्मको रिलिज मिति नजिकिँदै जाँदा निर्माण टिमले मकै एपसँगको सहकार्यमा क्विज प्रतियोगीता आयोजना गरेको छ । प्रतियोगितामा एक प्रश्न सोधिएको छ, जसको सहि जवाफ दिने मध्येबाट एक जनाले नगद १ लाख रुपैयाँ पाउनेछन् ।

फिल्ममा तपस्याको भूमिका निर्वाह गरेकी मलिका महतले आफ्नो आँखाको ज्योति कसरी गुमाउछिन् ? प्रतियोगीतले जवाफका लागि ट्रेलर हेरेर दिएको अप्सनमध्ये एकमा टिक लगाउनुपर्नेछ । टिक लगाएपछि प्रतियोगीले आफ्नो नाम र नम्बरसँगै इमेल सहितको प्रयोग गरि सबमिट गर्नुपर्ने हुन्छ । यसमा विश्वभरका जो कोहीले पनि सहाभागिता जनाउन सक्नेछन् ।

सहभागिताको लागि https://meromakaii.com/yatra लिंकमा क्लिक गर्नुपर्ने हुन्छ ।

नेपालबाट विजयी भए १ लाख नगद र विदेशबाट भए नौ सय युएस डलर प्रदान गरिने प्रस्तुतकर्ता चिजकुमार श्रेष्ठले बताए । 

यो प्रतियोगिता आउँदो चैत्र २९ गते विहान ८ बजे बन्द गरिने छ भने आउँदो वैशाख २० गते फेसबुक लाइभ मार्फत विजेता घोषणा गरिनेछ ।

यस प्रतियोगितामा सहभागी हुनेले उल्लेखित शर्त तथा नियम पढ्नु आवश्यक छ । फिल्ममा डेब्यू फिल्ममार्फत नै आफ्नो एक किसिमको फ्यान फ्लोअर्स बनाउन सफल सलिनमान बनिया, सलोन बस्नेत, जान्वी बस्नेत, जय नन्द लामा, रेअर राई, प्रेक्षा बज्राचार्य, धिरेन शाक्य, राजाराम पौडेल, विशाल कटवाल, समृद्धि राई, योगेश जंग कुँवर, ईश्वर पौडेल, नानीकाजी डंगोल, राजेश बिसुराल, ईश्वर पौडेल, देशभक्त खनाल, कमल मैनाली, सौगात शर्मा लगायतको अभिनय रहेको छ । फिल्ममा विदेशी कलाकारहरु चाइनाका जुन झाङ र केन्याका बबीको पनि अभिनय रहेको छ । फिल्ममा बालकलाकारको रुपमा पछिल्लो समय युट्युबमा चर्चा रहेका अंकित संग्रौला र एन्जल राई रहेका छन् ।

कोटकी कालिकादेवी फिल्मस् प्राइभेट लिमिटेड, क्रिएटिभ फिल्म प्रोडक्सन र हरि ओम सिने मेकर्सको ब्यानरमा निर्माण भएको फिल्ममा केशव भट्टराईसँगै चिज कुमार श्रेष्ठ पनि प्रस्तुतकर्ता छन् । फिल्ममा बिक्रम पराजुली, मुक्ति तिम्सिना र राम शरण घिमिरे सह–निर्माता रहेका छन् । फिल्मका निर्माता सुशील पोखरेल हुन् भने यसको कार्यकारी निर्माता सर्जुमान लिगल रहेका छन् ।

फिल्ममा कथापनि सम्राटकै रहेको छ भने यसलाई उनिसँगै सुरेश न्यौपाने, प्रतिक पौडेल र शिशिर खातीले मिलेर लेखेका हुन् ।