सुर्खेत, ८ वैशाख- कर्णाली प्रदेश मात्र नभएर देशकै महत्त्वपूर्ण पर्यटकीय गन्तव्य हो, मुगुको रारा । रारालाई धर्तीको स्वर्ग पनि भन्ने गरिन्छ । गत वैशाख १ गते कर्णाली प्रदेश सरकारले कर्णाली–रारा पर्यटन वर्ष– २०७५ को उद्घाटन भव्यरूपमा सम्पन्न गर्‍यो । प्रधानमन्त्री केपी शर्मा ओलीले रारा किनारबाटै देशवासीलाई सम्बोधनसमेत गरे । यसले सम्पूर्ण नेपालका लागि, अझै कर्णालीका लागि रारा कति महत्त्वपूर्ण छ भन्ने कुरा छर्लङ्ग हुन्छ ।

कसरी पुगिन्छ त धर्तीको स्वर्गमा ? रारा जान अहिले विभिन्न सञ्चारमाध्यममा आएका समाचारमा जस्तो गाह्रो भने छैन । सुर्खेतदेखि २ दिनमा सजिलै सडक यात्राबाट रारा पुग्न सकिन्छ । कर्णालीको राजधानी सुर्खेतबाट हवाई यात्रामा गए त उसैदिन राराको अवलोकन गर्न पाइन्छ । विमानमा जाने हो भने मुगुको गमगढी, ताल्चा विमानस्थल र रारा मात्रै हेर्न पाइने अवसर प्राप्त हुनेहुँदा सुर्खेतबाट रारा जान सडक नै उपयोगी बन्न सक्छ ।

यदि तपाईंँले रारा जान चाहनुभयो भने कम्तिमा सुर्खेतदेखि रारासम्मका लागि ६ दिनको समय छुट्याउनुपर्ने हुन्छ । यहाँ मैले सडकमार्गको बारेमा जानकारी दिन गइरहेको छु । सुर्खेतसम्म जुनसुकै माध्यमबाट आए पनि यहाँबाट तपाईंंले गाडी रिर्जव गर्ने वा सुर्खेत–मुगु जाने सार्वजनिक बसमा यात्रा गर्ने सक्नुहुन्छ । सुर्खेतबाट मुगुको ताल्चा विमानस्थलसम्मको सार्वजनिक बस भाडा १७ सय रूपैयाँ हो ।

तपाईंंले अन्य जीपहरू पनि रिजर्भ गरे जान सक्नुहुन्छ । सानो गाडीमा जानु भए यहाँले भनेको ठाँउमा रोक्ने, फोटो खिच्ने र अन्य खानपिन गर्न अत्यन्तै सहज हुन्छ । सुर्खेतबाट हिँडेको पहिलो दिन दैलेखको रानीमत्ता हुँदै राकम कर्णाली भएर कालिकोटको नाग्मसम्म सहजै पुग्न सकिन्छ । सडक दैलेखको घट्टे खोलाबाहेक अन्यत्र राम्रो छ ।

यहाँहरूले जान चाहे जुम्ला पनि पुग्न सक्नुहुन्छ सोही दिन । यो यात्रामा तपाईंले जुम्ला पनि नछुटाउँदा रमाइलो हुन्छ । नाग्मबाट जम्मा ३२ किलोमिटर टाढा रहेको जुम्लामा तिला कर्णालीले बनाएका मनमोहक फाँटहरू, भीरमा टाँसेर बनाइएकाजस्ता घरहरू, अनि मनोरम पाटनहरू अवलोकन गर्न सक्नुहुन्छ । जुम्लामा पुगेर चन्दननाथ मन्दिर, केटीएस लगायतका अन्य भौतिक संरचना, पर्यटकीय स्थलहरूको अवलोकन गर्ने अवसर समेत प्राप्त हुनेछ । यसका साथै तातोपानीमा नुहाउने अवसर समेत पाउन सकिन्छ ।

जुम्लाबाट सोझै ७३ किलोमिटर यात्रा गरी रारा पुग्न सकिन्छ । त्यो रुट भने नयाँ हो । तर उक्त सडकमा पनि पानी नपरेको दिन गाडीमा सहजै जान सकिन्छ ।

यदि तपाईं त्यो खतरा मोल्न नचाहने हो भने तपाईंले फेरि नाग्म आउनुपर्ने हुन्छ र नाग्मबाट ९३ किलोमिटरको यात्रा तय गर्नुपर्ने हुन्छ । नाग्मबाट रारासम्म नै सडक ग्राभेल गरिएको छ । सडकमा यात्रा गर्दा त्यति डराइहाल्नुपर्ने स्थिति छैन । उसै पनि रारा जाने भनेको साहसिक यात्रा नै हो ।

नाग्मबाट हिँडेको खण्डमा यहाँहरूको खाना खाने ठाउँ गोठी जिउला (सिंजा) हालको कनकासुन्दरी गाँउपालिका, जुम्लामा हो । खस राज्यको राजधानीको रूपमा रहेको, विराट राजाको दरबार रहेको, कनकासुन्दरी देवीको मन्दिर र पाण्डव गुफा समेत रहेको उक्त सिंजा क्षेत्र मनोरम छ । विकटजस्तो देखिए पनि उत्पादनका हिसाबले धनी क्षेत्र हो ।

तपाईंहरूले यहाँ खाना खाएपछि भुलभुलेमा गएर चिया पिउन सक्नुहुन्छ । तत्पश्चात मुगु जिल्लाको सिमानामा पुगिन्छ । सेनाको श्री श्रीदल पोस्ट आएपश्चात तपाईं राराको नजिक पुग्दै हुनुहुन्छ भन्ने थाहा पाए हुन्छ ।

त्यहाँबाट बढीमा ३ घण्टामा मुगुको ताल्चा विमानस्थलमा पुग्न सकिन्छ । यहाँहरूले ताल्चामा बास बसेर बिहानै रारा जान सक्नुहुन्छ, नभए उसै दिन राराको यात्रा तय गरेर रारा परिसरमै रहेका होटलमा बस्ने गरी पुग्न सक्नुहुन्छ ।

श्रीदल गुल्म भन्दा माथि गाडी सेनाले जान दिँदैन । गाडी त्यहाँ पार्किङ गरेर करीब आधा घण्टा हिँडेपछि धर्तीको स्वर्ग राराको दर्शन पाइन्छ । अनि रारा किनारै किनार पैदल वा घोडामा सवार भएर १ घण्टामा डाँफे होटलमा पुग्न सकिन्छ ।

रारा यात्रामा अग्ला हिमालहरूको दृश्यावलोकन गर्ने अवसर समेत पाइन्छ । राराको रङ बदल्ने बानी पनि अनौठो छ, जो यहाँ शब्दमा व्यक्त गर्न कठिन छ । जे होस्, तपाईं जहाँ हुनुहुन्छ, तपाईंको बाटो राराले कुरेर बसेकी छिन्, तर उनको एउटै आग्रह के छ भने रारा छेउछाउमा फोहोर भने नगरिदिनुहोला ।