काठमाडौं – प्रभु समूहले नेपालमा पहिलो पटक डिजिटल भिडियो प्रशारण (डीभीबी) मा आधारित प्रभु टीभीले सेवा प्रारम्भ गरेको छ ।

ओटीटी प्रणालीमा आधारित भएर मोबाइल, ट्याब्लेट तथा ल्यापटपमा समेत आफूले छानेका च्यानल हेर्न सकिने छ । प्रभु समूहका अध्यक्ष देवीप्रकाश भट्टचनले सेवाको प्रदर्शन गरी शुभारम्भ गरेका छन् । प्रभु टीभीले कल साइनमा देशव्यापी रुपमा वर्षको ३ सय ६५ दिन नै उच्च गुणस्तरीय डिजिटल टीभी च्यानलको प्रशारण सेवा प्रदान गर्नेछ ।

प्रभु टीभीले कल साइनमार्फत् (डीभीबी) प्रविधिमा आधारित भएर विभिन्न राष्ट्रिय तथा अन्तर्राष्ट्रिय टीभी च्यानल तथा ओटीटी प्रविधिमा मोबाइल, ट्याब्लेट तथा ल्यापटपमा इन्टरनेटको माध्यमबाट देशभरि नै वितरण गर्नेछ ।

प्रभु टीभीको आधिकारिक सेटअप बक्स र जडान गर्न सहज एन्टिनाको खरिदसँगै ग्राहकलाई सबै स्थानीय प्रशारित टीभी च्यानलको पहुँच हुनेछ । अन्तर्राष्ट्रिय टीभी च्यानल र विशेष कार्यक्रम समेत उच्च गुणस्तरमा हेर्न सकिने जनाइएको छ ।

प्रभु टीभीले काठमाडौं, चितवन र पोखरामा आफ्ना सेवा प्रदान गर्ने भएपनि भविष्यमा विस्तार गर्दै जाने जनाइएको छ । पूर्वाञ्चल क्षेत्र, बुटवल, भैरहवा, नेपालगञ्ज र कोहलपुरमा समेत प्रशारण गर्ने लक्ष्य लिइएको छ । प्रभु टीभीले विभिन्न प्रकारका च्यानल बालबालिका, चलचित्र, खेलकुद, संगीत, मनोरञ्जन र सूचनामुलक नेपाली तथा अन्तर्राष्ट्रिय च्यानल समेत प्रस्तुत गर्ने जनाइएको छ ।

ग्राहकको सुविधालाई ध्यानमा राखेर विभिन्न प्रारम्भिक प्याकेजको व्यवस्था गरिएको छ । जसअन्तर्गत एकल प्रयोगकर्ताको हकमा ६ महिनाको शुल्क १ हजार ६ सय रुपैयाँ र सेटअप बक्सबापत १ हजार रुपैयाँ तथा संस्थागत प्रयोगकर्तालाई मासिक २ सय रुपैयाँ र सेटअप बक्सबापत ८ सय रुपैयाँ पर्नेछ ।

प्रभु समूह अन्तर्गत बैकिङ्ग, बीमा, लघुवित्त, क्यापिटल मार्केट, हेलिकप्टर, व्यवस्थापन र सञ्चार क्षेत्रसँग सम्बन्धित विभिन्न कम्पनी आवद्ध रहेका छन् ।