कर्णाली प्रदेशसभा दलको कार्यालयमा मुख्यमन्त्री महेन्द्रबहादुर शाहीविरुद्ध दर्ता भएको अविश्वास प्रस्तावपछि उत्पन्न संकट तत्काललाई टरेको देखिएको छ ।

विपक्षमा हस्ताक्षर गरेकामध्ये केही सांसदलाई पक्षमा पार्न सफल भएपछि मुख्यमन्त्री शाहीमाथि आइलागेको संकट टरेको हो ।

संकट टरेपछि सुर्खेतको वीरेन्द्रनगर–७ इत्रामस्थित मुख्यमन्त्री शाहीको निवासमा प्रदेशसभा सदस्य, कार्यकर्ता र समर्थकको भीड लागेको छ । नेकपाका वरिष्ठ नेता माधवकुमार नेपाल पक्षका प्रकाश ज्वालासहित ८ जनामध्ये ७ जनालाई सरकारको पक्षमा ल्याएपछि शाही निवासमा खुसीयाली छाएको छ ।

नेकपाका नेता कार्यकर्ता, नेकपा निकट पत्रकारदेखि प्रदेशसभा सांसदलाई सरकार जोगिएको भन्दै मुख्यमन्त्री निवासमा केरा र स्याउ बाँडिएको छ । मुख्यमन्त्री शाही, आर्थिक मामिला तथा योजना मन्त्री प्रकाश ज्वाला, आन्तरिक मामिला तथा योजना मन्त्री नरेश भण्डारी, भूमि व्यवस्था, कृषि तथा सहकारी मन्त्री विमला केसी, सांसदहरू रातो कामी, विन्दमान विष्ट, गोपाल शर्मा लगायत मुख्यमन्त्री निवासमा भेला भएका छन् ।

नेपाल पक्षका ४ जना मन्त्री

नेकपामा आएको विवादले नेपाल पक्षलाई फाइदा हुने देखिएको छ । विवाद समाधानका क्रममा प्रदेश सरकारमा ज्वालासहित ४ जनालाई मन्त्री बनाउने सहमति भएको छ । यसअघि नेपाल पक्षबाट ज्वाला मात्रै सरकारमा मन्त्री थिए ।

मुख्यमन्त्री शाहीलाई मन्त्रीका लागि ज्वालाले ४ जनाको नाम बुझाएका छन् । सुर्खेतकै सांसद पदमा खड्का, मुगुका चन्द्रबहादुर शाही, दैलेखका अम्मरबहादुर थापा र जाजरकोटका करवीर शाहीमध्ये ३ जना मन्त्री हुनेछन् । पूर्व माओवादीको तर्फबाट विन्दमान विष्ट मन्त्री बनेको अवस्थामा पदमा खड्का मन्त्री नहुने स्रोतको दाबी छ ।

उपसभामुख, दलको उपनेतामा सहमति खोजिँदै

स्रोतका अनुसार उपसभामुख पुष्पा घर्तीलाई अविश्वासको प्रस्ताव ल्याएर भए पनि हटाउने तयारी भएको सरकारका एक मन्त्रीले लोकान्तरलाई जानकारी दिए । संसदीय दलको उपनेतामा कसलाई राख्ने भन्ने कुरा अहिले चलिरहेको मुख्यमन्त्री कार्यालय स्रोतले लोकान्तरलाई बतायो । 

अविश्वासको प्रस्ताव दर्ता गराउने पक्षको बैठक बस्न नसकेपछि विपक्षमा लागेका ३ जना पूर्व माओवादी सांसद मुख्यमन्त्रीकै सर्मथनमा फर्किन लागेको स्रोतको दाबी छ । त्यसका लागि पूर्व सांसद नरबहादुर विष्ट, नेकपा जिल्ला कमिटी सुर्खेतका सचिव कृष्णबहादुर विसी लगायतको टीम परिचालन भएको छ ।