राष्ट्रपति विद्यादेवी भण्डारी बडादशैं २०७८ को महाष्टमीका अवसरमा बुधवार काठमाडौंस्थित विभिन्न शक्तिपीठमा दर्शन तथा पूजा अर्चना गरेका छन् ।

यस क्रममा राष्ट्रपति भण्डारीले मन्दिरमा उपस्थित पूजारी र सर्वसाधारणलाई दशैंको शुभकामना दिनुका साथै उनीहरूका सुझाव ग्रहण गरेका छन् ।

महाअष्टमी पर्व विशेष रूपमा शक्ति स्वरूपा भगवतीको प्रार्थना गर्ने दिनका रूपमा लिइन्छ ।
 
राष्ट्रपति भण्डारीले अपराह्न साढे ४ बजे नक्सालस्थित नक्साल भगवती मन्दिरमा पुगेर काठमाडौंस्थिति देवी मन्दिरको दर्शनारम्भ गरेका थिए । सो अवसरमा मन्दिरमा उपस्थित पूजारी, उनीहरूका परिवार र सर्वसाधारणलाई राष्ट्रपति भण्डारीले विजयादशमी २०७८ का अवसरमा सुख, शान्ति र समृद्धिका लागि शुभकामना व्यक्त गरे ।

मन्दिरका पूजारी खगेन्द्र निरौलाले राष्ट्रपतिलाई नवदुर्गाको प्रसाद र टीका लगाइदिँदै मुलुकको आर्थिक विकासका लागि देशका खनिज पदार्थको उत्खनन् गर्न तथा मुलुक भित्रको अपार स्रोतसाधनको सही सदुपयोग गर्न सुझाव दिए ।

राष्ट्रपति भण्डारीलाई मन्दिरका मूल पूजारी निलिक महर्जनले मन्दिर परिसरस्थित ऐतिहासिक ढुंगेधाराको दुरावस्थाबारे अवगत गराएका थिए ।

राष्ट्रपति भण्डारीले सदाझैं मैतीदेवी, गुह्येश्वरी, कालिकास्थान, शोभा भगवती लगायतका मन्दिरमा दर्शन गरेका थिए । राष्ट्रपति भण्डारीले बुधवार बिहान काभ्रेपलाञ्चोकको पाँचखाल नगरपालिका–९ पलाञ्चोकस्थित भगवती मन्दिरमा पुगेर पूजाअर्चना गरिन् ।

धार्मिक मान्यता अनुसार शक्तिका लागि भगवतीको आशीर्वाद लिने पर्व नवरात्रको आठौं दिन पनि काठमाडौं उपत्यकालगायत देशभरका शक्तिपीठमा भक्तजनको घुइँचो लागेको छ ।

आश्विन शुक्ल पक्ष शक्तिस्वरुपा दुर्गा भवानीको विशेष आराधना गर्ने पर्वका रूपमा चिनिन्छ । वर्षमा ४ वटा नवरात्र पर्ने भए पनि शरद ऋतुअन्तर्गत आश्विन शुक्ल पक्षमा पर्ने नवरात्र विशेष रूपमा मनाइन्छ ।

बडादशैं समेत भनिने शारदीय नवरात्र देशभर भव्य रूपमा मनाइन्छ । देवीको पूजा, पाठ एवं दर्शन गर्न भक्तजन मन्दिर जाने गर्छन् ।

शक्तिपीठमा पनि पशुपति क्षेत्रस्थित गुह्येश्वरी मन्दिरको विशेष महत्त्व रहेको विभिन्न पुराणमा उल्लेख गरिएको छ ।