२८ जेठ २०८३, बिहीबार
सुरुङ खनेर कारागारबाट फरार भई लामो समय कानूनको आँखामा धुलो छर्किएका कर्तव्य ज्यान मुद्दाका दोषी राम जैस मौर्या दोस्रो पटकको ‘जेल ब्रेक’मा पनि प्रहरीको फन्दामा परेका छन् ।
पछिल्लोपटक जेनजी आन्दोलनका क्रममा फरार भएका मौर्यालाई कपिलवस्तु प्रहरीले विशेष अपरेशन सञ्चालन गरी कृष्णनगर क्षेत्रबाट पक्राउ गरेको हो ।
कपिलवस्तुको तत्कालीन उदयपुर गाविस–८ (हाल महाराजगञ्ज नगरपालिका–६) बन्जरिया निवासी ५८ वर्षीय मौर्या कर्तव्य ज्यान मुद्दामा दोषी ठहर भएका व्यक्ति हुन् ।
उनले २०६३ कात्तिक २५ गते बहादुरगञ्जमा ड्युटीमा खटिएका प्रहरी जवान नवीन गुरुङको गोली हानी हत्या गरेका थिए ।
कपिलवस्तु जिल्ला अदालतको फैसलाअनुसार उनीमाथि २० वर्षभन्दा बढी कैद सजाय तोकिएको थियो ।
मौर्या २०६६ साल माघ १ गते जिल्ला कारागार कपिलवस्तुबाट अन्य सात कैदीसँगै सुरुङ खनेर फरार भएका थिए ।
कारागारभित्रै गोप्य रूपमा सुरुङ निर्माण गरी आठ जना कैदी एकैपटक भाग्न सफल भएको घटना त्यसबेला देशभर चर्चाको विषय बनेको थियो ।
उक्त घटनाले कारागारको सुरक्षा व्यवस्थामाथि गम्भीर प्रश्न उठाएको थियो ।
जेलबाट फरार भएपछि उनीविरुद्ध थुनुवा तथा कैदी भगाएको मुद्दासमेत दर्ता भएको थियो ।
सो मुद्दामा अदालतले २०६८ साल जेठ १० गते थप पाँच वर्ष तीन महिना तीन दिन कैद सजाय सुनाएको थियो ।
पछि कर्तव्य ज्यान मुद्दाको फैसला तत्कालीन पुनरावेदन अदालत बुटवलबाट संशोधन भई २० वर्ष कैद कायम गरिएको थियो । विभिन्न समयमा पक्राउ परेपछि उनलाई कैद भुक्तानका लागि ललितपुरस्थित नख्खु कारागारमा राखिएको थियो ।
तर, उनको फरारीको श्रृंखला त्यतिमै रोकिएन । २०८२ साल भदौ २४ गते नख्खु कारागारबाट पनि उनी फरार हुन सफल भएका थिए । त्यसयता नेपाल प्रहरीका विभिन्न इकाइले उनको खोजीलाई निरन्तरता दिएका थिए ।
प्रहरीका अनुसार गोप्य सूचनाका आधारमा मौर्या कपिलवस्तुको कृष्णनगर नगरपालिका–१ कुकुरभुकुवा क्षेत्रमा लुकेर बसेको जानकारी प्राप्त भएपछि विशेष अपरेशन सञ्चालन गरिएको थियो । जिल्ला प्रहरी कार्यालय कपिलवस्तुका प्रमुख प्रहरी उपरीक्षक मनोहरप्रसाद भट्टका अनुसार इलाका प्रहरी कार्यालय कृष्णनगरका प्रहरी निरीक्षक कृष्णबहादुर कुँवर नेतृत्वको टोलीले उनलाई पक्राउ गरेको हो ।
प्रहरीले मौर्यालाई कृष्णनगर नजिक दशगजास्थित आमबगैंचामा हिँडिरहेको अवस्थामा नियन्त्रणमा लिएको जनाएको छ ।
प्रारम्भिक सोधपुछका क्रममा उनले आफ्नो परिवार भारतमा रहेको र आफू भारत–नेपाल आवतजावत गर्दै आएको बताएका छन् ।
प्रहरी अनुसन्धानका क्रममा नख्खु कारागारमा रहँदा उनले जेलभित्र पान पसल सञ्चालन गरेको तथा अन्य कैदीबन्दीका लागि मिठाइसमेत बनाउने गरेको खुलेको छ ।
पक्राउपछि आवश्यक कानूनी प्रक्रिया पूरा गरी मौर्यालाई २०८३ साल जेठ २५ गते जिल्ला अदालत कपिलवस्तुमा उपस्थित गराइएको थियो ।
अदालतमा पेश गरेपछि बाँकी कैद सजाय भुक्तानका लागि उनलाई पुन: कारागार कार्यालय कपिलवस्तु पठाइएको प्रहरीले जनाएको छ ।
सुरुङ खनेर जेलबाट भागेको, अर्को कारागारबाट पनि फरार भएको र वर्षौंसम्म प्रहरीको पहुँचबाहिर रहन सफल मौर्याको पक्राउलाई प्रहरीको राम्रो सफलताका रूपमा हेरिएको छ ।
भिडियो सामग्री :
