सामाजिक सञ्जाल टिकटकमा भएको एउटा चिनजानले शर्मिला (नाम परिवर्तन) को जीवनलाई यस्तो मोडमा पुर्‍यायो, जहाँ प्रेम, विवाह र विश्वास अन्त्यमा ठगी, कीर्ते कागजात र अदालतको मुद्दासम्म पुगेको छ ।

रामेछापका उज्ज्वल गुरागाईंसँग टिकटकमार्फत चिनजान भएकी शर्मिलाले शुरूमा उनलाई आफ्नो जीवनसाथी ठानिन् ।

उज्ज्वलले आफू विवाहित भए पनि पहिलो वैवाहिक सम्बन्ध सुखद् नरहेको र कानूनी रूपमा सम्बन्धविच्छेद गरिसकेको भन्दै शर्मिलासँग विवाह गर्ने प्रस्ताव राखे ।

शर्मिलाले सम्बन्धविच्छेदको प्रमाण मागिन् । उज्ज्वलले कागजात देखाए । त्यसपछि उनीहरूको सम्बन्ध विवाहसम्म पुग्यो ।

शर्मिलाका अनुसार उनीहरू काठमाडौंको नक्सालस्थित एक अपार्टमेन्टमा सँगै बस्न थाले । तर, विवाहपछि पनि उज्ज्वलले उनलाई आफ्नो परिवार वा आफन्तसँग भेटाएनन् । परिवारले सम्बन्ध स्वीकार नगरेको भन्दै उनले पछि विवाह दर्ता गरिदिने आश्वासन दिए ।

केही समयपछि उज्ज्वल एक्लै रामेछाप गएर विवाह दर्ता गराएको भन्दै कागजात लिएर फर्किए । शर्मिलाले त्यो कागजातलाई आफ्नो वैवाहिक सम्बन्धको कानूनी आधार मानेर विश्वास गरिन् ।

उज्ज्वलले नयाँ व्यवसाय शुरू गर्ने योजना सुनाए । व्यवसाय विस्तारका लागि रकम आवश्यक परेको बताए । श्रीमान् ठानेर शर्मिलाले आफूसँग रहेको ११ तोला सुनका गहना र ८ लाख रुपैयाँ उनलाई दिइन् । तर, महिनौं बित्दासमेत कुनै व्यवसाय शुरू भएन । उल्टै उज्ज्वलको व्यवहार बदलिँदै गयो ।

त्यसपछि शर्मिलाले विवाह दर्ताको कागजात पुन: हेर्न थालिन् ।

कागजातमा उल्लेख गरिएको मिति (२०७७/१२/२५) शंकास्पद लागेपछि उनले सम्बन्धित पालिकामा बुझिन् । त्यहाँबाट प्राप्त जानकारीले उनको खुट्टामुनिको जमिन नै भासियो । पालिकाको अभिलेखमा त्यो मितिमा उज्ज्वल र शर्मिलाको विवाह दर्ता भएको कुनै विवरण थिएन । बरु सोही मितिमा उज्ज्वलकै पहिलो श्रीमतीसँग विवाह दर्ता भएको अभिलेख भेटियो ।

शर्मिलाले कागजातबारे प्रश्न गर्दा उज्ज्वलले शुरूमा ‘कम्प्युटर टाइप मिस्टेक’ भन्दै टार्ने प्रयास गरे । तर त्यसपछि थप तथ्यहरू खुल्दै गए ।

शर्मिलाका अनुसार उज्ज्वलले पहिलो श्रीमतीसँग सम्बन्धविच्छेद नै नगरेको खुलेपछि उनी थप सशंकित भइन् । जवाफ खोज्दा उज्ज्वलले आफू जापानबाट फर्किएको र पुन: जापान जाँदा शर्मिलालाई डिपेन्डेन्ट भिसामा लैजानका लागि नक्कली विवाह दर्ता बनाएको बताएका थिए ।

तर त्यसले शर्मिलाको शंका मेटाएन । उनले आफूले दिएको रकम र सुन फिर्ता माग्न थालिन् । त्यसपछि सम्बन्ध झन् बिग्रियो । शर्मिलाको आरोपअनुसार उज्ज्वलले गालीगलौज गर्न थाले, मानसिक तनाव दिन थाले र पटक–पटक धम्कीसमेत दिए । उनले प्रहरीसमक्ष दिएको जाहेरीमा आफ्नो इच्छाविपरीत पटक–पटक शारीरिक सम्पर्क गर्न बाध्य बनाइएको आरोपसमेत लगाएकी छन् ।

यसबीच शर्मिलाका परिवारले उज्ज्वललाई पहिलो श्रीमतीसँग सम्बन्धविच्छेद भएको प्रमाण ल्याउन भने । त्यसपछि शर्मिला धरानस्थित माइती पुगिन् । त्यहीँ पुगेपछि आफन्तसँग परामर्श गरेर उनले प्रहरीमा उजुरी दिने निर्णय गरिन् ।

प्रहरी अनुसन्धानपछि उज्ज्वल पक्राउ परे । अनुसन्धान मिसिल जिल्ला सरकारी वकिल कार्यालयमा पुगेपछि सरकारी वकिलले उनीविरुद्ध काठमाडौं जिल्ला अदालतमा जबर्जस्ती करणी, ठगी र लिखतसम्बन्धी कसुरमा मुद्दा दर्ता गर्‍यो ।

मुद्दाको अनुसन्धानका क्रममा दिएको बयानमा उज्ज्वलले आफू र शर्मिलाबीच टिकटकमार्फत चिनजान भएको तथा श्रीमान/श्रीमतीसरह बस्दै आएको स्वीकार गरेका छन् ।

उनले कानूनी रूपमा पहिलो श्रीमतीसँग सम्बन्धविच्छेद नभएको अवस्थामा शर्मिलालाई जापान लैजाने उद्देश्यले नक्कली विवाह दर्ता प्रमाणपत्र बनाएको स्वीकार गरेका छन् । शर्मिलाका आफन्तलाई देखाउनका लागि पहिलो श्रीमतीसँग सम्बन्धविच्छेद भएको नक्कली कागजातसमेत तयार गराएको उनले सरकारी वकिलसमक्ष बताएका छन् ।

विवाह दर्ता र सम्बन्धविच्छेदसम्बन्धी कागजात कीर्ते गरी बनाउनु आफ्नो गल्ती भएको र त्यसबापत कानूनबमोजिमको सजाय भोग्न तयार रहेको उनको बयानमा उल्लेख छ ।

तर शर्मिलाबाट ८ लाख रुपैयाँ र ११ तोला सुन लिएको आरोप भने उनले अस्वीकार गरेका छन् । त्यस्तै, जबर्जस्ती करणी गरेको आरोपसमेत उनले इन्कार गरेका छन् ।

अदालतमा दर्ता भएको मुद्दाको टुंगो लाग्न बाँकी छ । तर टिकटकमा शुरू भएको एउटा सम्बन्ध अहिले कीर्ते कागजात, ठगी र जबर्जस्ती करणीको आरोपसहित अदालतको इजलासमा पुगेको छ ।