रुसको राजधानी मस्कोतर्फ आएका दर्जनौं युक्रेनी ड्रोनलाई रुसी वायु प्रतिरक्षा प्रणालीले सोमबार बिहान खसालेको छ ।

मस्कोका मेयर सर्गेई सोब्यानिनका अनुसार राजधानीतर्फ आइरहेका करिब ६० वटा ड्रोन खसालिएका हुन् । ड्रोन खसालिएका क्षेत्रमा उद्धार तथा आपत्कालीन सेवाका टोली परिचालन गरिएको उनले टेलिग्राममार्फत जानकारी दिएका छन् ।

ड्रोन आक्रमणका कारण मस्कोका शेरेमेत्येभो, दोमोदेदोभो, भ्नुकोभो तथा झुकोभ्स्की विमानस्थलमा केही समय उडान अवरुद्ध गरिएको थियो । पछि उडान सेवा पुनः सञ्चालनमा ल्याइएको रुसी उड्डयन निकायले जनाएको छ ।

रुसी रक्षा मन्त्रालयका अनुसार रातभरिमा रुस तथा रुसको नियन्त्रणमा रहेका युक्रेनी क्षेत्रहरूमा गरी कुल ३०१ वटा ड्रोन खसालिएका छन् ।

गत साता युक्रेनी ड्रोनले मस्कोको एकमात्र तेल प्रशोधन केन्द्रलाई पुनः निशाना बनाएपछि राजधानीमा सुरक्षा सतर्कता बढाइएको थियो ।

युक्रेनी ड्रोन आक्रमणका कारण आपूर्ति शृंखलामा समस्या आएपछि क्रिमियामा इन्धन संकटसमेत उत्पन्न भएको बताइएको छ ।

यता युक्रेनको उत्तरपूर्वी सुमी क्षेत्रमा भएको रुसी ड्रोन आक्रमणमा एकै परिवारका तीन जनाको मृत्यु भएको छ । क्षेत्रीय अभियोजन कार्यालयका अनुसार १३ वर्षीय बालक, उनका ३६ वर्षीय बुवा र ७३ वर्षीया हजुरआमाको ज्यान गएको हो । बालककी आमा र उनका दुई दाजुभाइ तथा दिदीबहिनी घाइते भएका छन् ।

दक्षिणपूर्वी शहर जापोरिज्झियामा भएको अर्को ड्रोन आक्रमणमा एक महिलाको मृत्यु हुनुका साथै तीन जना घाइते भएका छन् । 

त्यस्तै, आइतबार साँझ ओडेसा क्षेत्रमा रुसले प्रहार गरेको इस्कान्दर ब्यालिस्टिक क्षेप्यास्त्र आक्रमणमा एक जनाको मृत्यु र तीन जना घाइते भएको क्षेत्रीय गभर्नर ओलेह किपरले बताएका छन् । आक्रमणबाट एक कृषि केन्द्रमा आगलागी हुँदा सवारीसाधन र इन्धन भण्डारण ट्यांकीमा क्षति पुगेको जनाइएको छ ।

यसैबीच, रुसद्वारा कब्जा गरिएको क्रिमियाको सेवास्तोपोल शहरमा सबै खुला सार्वजनिक कार्यक्रम रद्द गरिएको छ । गभर्नर मिखाइल रज्भोजायेभले नागरिकलाई विद्युत् खपत कम गर्न आग्रह गरेका छन् ।