१६ असार २०८३, मंगलबार
राष्ट्रपति विद्यादेवी भण्डारीले आइतवार बिहान राष्ट्रपति निवासमा महाशिवरात्रि पर्वको संकल्प पूजा गरिन् ।
पर्व मनाउन आएका साधुसन्तलाई राज्यका तर्फबाट प्रदान हुने घन्ट, चमर, राडी, बख्खु, सीदा, त्रिशूल, कमान्डलु, पीताम्बर, जटायुक्त नरिवल, रामनामी लगायतका सामग्री राष्ट्रपतिबाट संकल्प भएको छ ।
पशुपति गुठी गोश्वारा कार्यालय प्रमुख सुशीला शर्माको अगुवाइमा अमालकोट कचहरी कार्यालयका द्वारे पूर्ण डङ्गोल परम्पराअनुसार संकल्प सामग्री खर्पनमा राखेर राष्ट्रपति निवास पुगेका थिए । संकल्प पूजापछि गोश्वारा प्रमुख कर्मचारीलाई पुरोहितले टीका लगाएर राष्ट्रपतिबाट उनीहरूलाई दक्षिणा प्रदान गरियो ।
राष्ट्रपतिबाट संकल्प पूूजा भएपछि त्रिदिवसीय महाशिवरात्रि पर्व शुरू भएको छ । यो शुरूआतसँगै पशुपतिमा आएका साधुसन्तले बिहान शोभायात्रा गरे । संस्कृति, पर्यटन तथा नागरिक उड्डयनमन्त्री प्रेम आलेको अगुवाइमा शोभायात्रा भएको थियो ।
शोभायात्रा लगत्तै पशुपति क्षेत्र विकास कोषले एक पत्रकार सम्मेलन आयोजना गरेर महाशिवरात्रि पर्वको पूर्व तयारी कार्य सकिएको जानकारी दिएको छ ।
महाशिवरात्रि पर्वका दिन मंगलवार बिहान ३ बजे नै पशुपतिनाथ मन्दिरको चारै ढोका खुला हुन्छ भने महाशिवरात्रिको चारै प्रहर भक्तजनलाई पंक्तिवद्ध भएर पशुपतिनाथको दर्शन व्यवस्था मिलाइएको जानकारी कोषका कोषाध्यक्ष नारायण सुवेदीले दिए ।
कोरोनाबाट बचाउ गर्न भक्तजन र दर्शनार्थीलाई अनिवार्य मास्क र भौतिक दूरी कायम गर्नुपर्ने गरी अनुगमन व्यवस्था मिलाइएको छ । पशुपतिनाथ दक्षिणढोका, पश्चिम रुद्रगाडेश्वरबाट दर्शनार्थीलाई मन्दिर प्रवेश मिलाइएको छ । फागुण कृष्ण एकादशीका दिन आइतवार बिहानै नागाबाबा सर्वाङ्ग भएका छन् ।
पञ्चदेवल पश्चिम डिलमा भारत जुना अखडाबाट केही नागिनी पनि आएका छन् । स्थलगत अनुगमनमा खटिएका पशुपति क्षेत्र विकास कोषका कुमार खतिवडाका अनुसार मन्दिर परिसरमा उत्कृष्ट साधुको आगमन भएको छ । केही रमिते साधु पनि आएका छन् ।
पशुपति गुठी गोश्वाराले धुनी जगाउन ३३ हजार किलो दाउरा साधुलाई वितरण गरेको छ । यो दाउरा प्रतिकिलो १३ रुपैयाँका दरले नेपाल वन लिमिटेडबाट खरिद गरेको वरिष्ठ लेखा सहायक युवराज रेग्मीले जानकारी दिए । कालमोचनघाटमा पनि यसरी नै दाउरा दिइएको छ । कालमोचनघाटस्थित सन्न्यासी, वैरागी, नाथ र उदासी अखडामा प्रशस्त साधुको आगमन भएको सावित्री माताले जानकारी दिइन् ।
गुठी संस्थानका सहायक प्रशासक आनन्दप्रसाद कर्माचार्यका अनुसार कालमोचनमा आएका साधुलाई दिइने सुविधामा कुनै कसर रहने छैन । पशुपति र कालमोचनका साधुको उचित स्वागत र दक्षिणासहित बिदाइ हुन्छ ।
विक्रम संवत् १९०३ को कोतपर्वमा मारिएकाको दाहसंस्कार भएको कालमोचनमा तत्कालीन श्री ३ जंगबहादुर राणाले साधुको पाउ परोस् भन्ने मनोकांक्षाका साथ शिवरात्रिका लागि साधु आमन्त्रण गरिएको इतिहास छ ।
जङ्गनन्द प्रकाशेश्वर गुठीबाट राज्यले साधुका लागि स्वागत गर्छ र यहाँ रहँदा बस्दा यी सबै सुविधा प्रदान गर्ने गरेको छ । पूर्वको पशुपतिनाथ भनिने खोटाङको हलेसी महादेव, नुवाकोटको दुप्चेश्वर, कास्कीको गुप्तेश्वर, महोत्तरीको जलेश्वर लगायतका कहलिएका शिवालयमा पनि महाशिवरात्रि पर्व पञ्चामृत स्नानसहित भगवान् शिवको अर्चनासहित मनाइँदैछ ।
यसैगरी कुम्भेश्वर पाटन, बडामहादेव साँगा, अनन्तलिङ्गेश्वर भक्तपुर, खञ्जनेश्वर अमालकोट, महामृत्युञ्जय महादेव जयवागेश्वरी, पाँचटाउके महादेव र जितजङ्ग प्रकाशेश्वर राजराजेश्वरी लगायतका शिवालयमा भक्तजनको चहलपहल शुरू भएको छ ।
महाशिवरात्रि पर्व फागुन १७ गते परेको छ । अमालकोट कचहरीका द्वारे पूर्ण डङ्गोलका अनुसार तमासा चटक देखाउनेलाई पनि यो पल्ट पशुपति क्षेत्रमा स्थान दिइएको छ । गोरखापत्रमा खबर छ ।
