०४ असार २०८३, बिहीबार
दर्जनौं लोकप्रिय गीतका सर्जक राजकुमार बगरको एकल गीत वाचन कार्यक्रम हुने भएको छ ।
गीतकार प्रतिष्ठान, नेपालले यही चैत २५ गते पोखरामा गीतकार बगरको एकल गीत वाचन कार्यक्रम आयोजना गरेको हो ।
पोखरा उद्योग वाणिज्य संघमा हुने कार्यक्रममा गीतकार बगरले आफ्नो नयाँ–पुराना दुई दर्जन चर्चित गीत वाचन गर्नेछन् ।
आयोजक गीतकार प्रतिष्ठानका अध्यक्ष हरिहर खनियाले गीत संगीत भरेर गाउँदा मात्रै होइन्, गीतकारले वाचन गर्दा पनि कर्णप्रिय सुनिन्छ भन्ने सोचले यसप्रकारको कार्यक्रम सुरु गरिएको जानकारी दिए ।
‘कविता–मुक्तक वाचन हुन सक्छ । त्यसैगरी गीत पनि वाचन हुन सक्छ र गीत संगीत भरेर गाउँदा मात्रै होइन्, गीतकारले वाचन गर्दा पनि कर्णप्रिय सुनिन्छ भन्ने सोचले गतवर्षदेखि यसप्रकारको कार्यक्रम सुरु गरेका हौं’ उनले भने । गत वर्ष तीर्थ श्रेष्ठको गीत वाचन गरिएकोमा यसवर्ष राजकुमार बगरले गीत वाचन गर्न लागेका हुन् ।
एकल गीत वाचन गीतकार बगरको पहिलो अनुभव हो । ‘गीतकारको यस प्रकारका कार्यक्रम बिरलै हुने गरेका छन् । यो मेरो पहिलो अनुभव भएकाले एकदमै उत्साहित छु’ बगरले भने ।
‘उडेर जून छुन्छु भन्थेँ’, ‘यता कुलो काट्दा...’, ‘तिम्लाई आफ्नो भन्ने मेरो अधिकार गुमेपछि’ लगायतका आफ्ना झन्डै २ दर्जन गीत वाचन गर्ने बगरले बताए ।
