अमेरिकी राष्ट्रपति डोनाल्ड ट्रम्पले रुस र चीनको बढ्दो प्रभावलाई रोक्नका लागि अमेरिकाले ग्रिनल्याण्डमाथि आफ्नो पूर्ण स्वामित्व कायम गर्नुपर्ने बताएका छन्। 

शुक्रबार सञ्चारकर्मीहरूसँग कुरा गर्दै ट्रम्पले राष्ट्रिय सुरक्षाका दृष्टिकोणले ग्रिनल्याण्डमाथि अमेरिकाको नियन्त्रण हुनु अनिवार्य रहेको दाबी गरेका हुन् । 
"देशहरूको आफ्नै स्वामित्व हुनुपर्छ र तपाईंले स्वामित्वको रक्षा गर्नुहुन्छ, भाडा (लिज) को होइन," ट्रम्पले बीबीसीको प्रश्नको जवाफ दिँदै भने। उनले ग्रिनल्याण्डलाई अमेरिकाले रक्षा गर्नुपर्ने बताउँदै यो कार्य सहज तरिका वा कठिन तरिकामध्ये कुनै पनि माध्यमबाट हुनसक्ने चेतावनी समेत दिए।

ह्वाइट हाउसले यसअघि नै डेनमार्कको यो अर्ध-स्वायत्त क्षेत्र खरिद गर्ने प्रस्ताव गरेको थियो, तर आवश्यक परे बलपूर्वक कब्जा गर्ने (एनेक्सेसन) विकल्पलाई पनि प्रशासनले नकार्न नसकिने जनाएको छ।

यता डेनमार्क र ग्रिनल्याण्डले भने अमेरिकी प्रस्तावलाई पूर्ण रूपमा अस्वीकार गर्दै यो भूभाग बिक्रीका लागि नभएको स्पष्ट पारेका छन्। डेनमार्कले कुनै पनि किसिमको सैन्य कदम चालेमा त्यसले ट्रान्स-एट्लान्टिक रक्षा गठबन्धन (नाटो) को अन्त्य हुने चेतावनी दिएको छ। क्यानडा र प्रमुख युरोपेली देशहरू लगायतका नाटो सहयोगीहरूले पनि डेनमार्कको सार्वभौमिकता र भौगोलिक अखण्डताको समर्थन गर्दै ग्रिनल्याण्डको भविष्यबारे निर्णय गर्ने अधिकार त्यहाँका जनता र डेनमार्कसँग मात्र रहेको बताएका छन्।

भौगोलिक रूपमा उत्तर अमेरिका र आर्कटिकको बीचमा अवस्थित ग्रिनल्याण्ड रणनीतिक रूपमा निकै महत्त्वपूर्ण मानिन्छ। यो क्षेत्र मिसाइल आक्रमणको पूर्वसूचना प्रणाली र सामुद्रिक मार्गहरूको निगरानीका लागि महत्त्वपूर्ण छ। राष्ट्रपति ट्रम्पले विना कुनै प्रमाण ग्रिनल्याण्डको वरिपरि रुसी र चिनियाँ जहाजहरू तैनाथ रहेको दाबी गर्दै अमेरिकाले यसलाई आफ्नो बनाउनुपर्ने जिकिर गरेका छन्।