०४ असार २०८३, बिहीबार
पर्साको वीरगञ्ज महानगरपालिस्थित एक स्टोरमा छापा मार्न गएको भन्सार र सशस्त्र प्रहरी बलको संयुक्त टोलीमाथि स्थानीयले आक्रमण गरेका छन् । घटनामा तीन जना सशस्त्र प्रहरी घाइते भएको र दुइटा सवारीसाधन तोडफोड भएको सशस्त्र प्रहरीका केन्द्रीय प्रवक्ता सशस्त्र प्रहरी नायब महानिरीक्षक विष्णुप्रसाद भट्टले जानकारी दिए ।
उनका अनुसार आज बिहान विशेष सूचनाको आधारमा आदर्श टोलमा अवैध रूपमा भन्सार छली लुकाई-छिपाई राखिएको सामान छापामारी गर्न एपीएफ सीमा सुरक्षा गुल्म मुख्यालय वीरगञ्ज र भन्सारको संयुक्त टोली परिचालन गरिएको थियो ।
छापा मारेर सामान लोड गर्ने क्रममा स्थानीय २०-२५ जनाको समूहले ढुंगामुढासहित आक्रमण गरेको उनले बताए ।
संयुक्त टोलीले करिब ५ लाख मूल्य बराबरका भन्सार छलीका ५ पोका कपडा बरामद गरेको उनले जानकारी दिए ।
