२४ जेठ २०८३, आइतबार
विश्वभर तीव्र गतिमा बढिरहेको मायोपिया (टाढा नदेख्ने दृष्टिदोष)प्रति जनचेतना फैलाउने उद्देश्यले दृष्टि आई केयर सिस्टमले जनचेतनामूलक र्याली निकालेको छ ।
शनिबार बिहान ७ बजे दृष्टि आई केयर सिस्टमको नेतृत्वमा काठमाडौं, वीरगञ्ज र बिर्तामोडमा आयोजित र्यालीमा सरकारी तथा गैरसरकारी निकाय, स्वास्थ्यकर्मी, विद्यार्थी, शिक्षक, अभिभावक तथा स्थानीय समुदायको उल्लेखनीय सहभागिता रहेको थियो ।
मायोपियासम्बन्धी सचेतना र जानकारी व्यापक बनाउने उद्देश्यले सबै उमेर समूहका नागरिकको सहभागितामा र्याली आयोजना गरिएको दृष्टि आई केयरले जनाएको छ ।
‘मायोपिया जनचेतना सप्ताह’ अन्तर्गत जेठ ३ गतेदेखि ९ गतेसम्म विभिन्न कार्यक्रम सञ्चालन गरिएको पनि आयोजकको भनाइ छ ।
यस अवधिमा विभिन्न विद्यालयमा स्क्रिनिङ कार्यक्रम सञ्चालन गरिनुका साथै सयौं बालबालिकाको प्रारम्भिक आँखा परीक्षण गरिएको थियो । परीक्षणमा सहभागी विद्यार्थीलाई दृष्टिसम्बन्धी सबै शाखामा निःशुल्क विस्तृत आँखा परीक्षण सेवा प्रदान गरिएको आयोजकले जनाएको छ ।
काठमाडौंमा आयोजित र्यालीलाई सम्बोधन गर्दै दृष्टि आई केयरका कार्यकारी निर्देशक डा. भाइराजा श्रेष्ठले यो अभियान केवल पदयात्रा मात्र नभई व्यवहार परिवर्तन, दृष्टिकोण परिवर्तन र भविष्यका पुस्ताको दृष्टि सुरक्षित बनाउने सामूहिक संकल्पको शुरूआत भएको बताए ।
त्यस्तै, नेपाल दृष्टि विशेषज्ञ संघका सचिव अभिनास झाले मायोपिया अर्थात् नजिक देख्ने तर टाढा नदेख्ने समस्या तीव्र गतिमा बढिरहेको र बालबालिकामा यसको प्रभाव बढी देखिएकाले समयमै नियन्त्रण नगरे भविष्यमा दृष्टि गुम्ने खतरा रहने बताए ।
नेपाल नेत्र सहायक संघका सचिव रमेश प्रधान तथा अप्टिकल व्यवसायी संघ नेपालका प्रवक्ता मनोज धिमालले सबै सरोकारवालाबीच सहकार्यबाट मात्रै मायोपिया नियन्त्रण सम्भव हुनेमा जोड दिए ।
मायोपिया विशेषज्ञ दीपक घिमिरेले मायोपियालाई सामान्य दृष्टिदोषका रूपमा मात्र नभई दीर्घकालीन रूपमा दृष्टि गुम्ने जोखिमसँग जोडिएको समस्याका रूपमा लिनुपर्ने बताए ।
उनले डिजिटल उपकरणको नियन्त्रित प्रयोग, नियमित बाह्य क्रियाकलापमा सहभागिता तथा नियमित आँखा परीक्षणमार्फत मायोपिया नियन्त्रण गर्न सकिने जानकारी दिँदै यसप्रति सामूहिक चेतना आवश्यक रहेको उल्लेख गरे ।
काठमाडौंमा आयोजित र्याली दृष्टि आई केयर सिस्टम कलंकीबाट शुरू भई कलंकीचोक, रविभवन हुँदै सोल्टीमोड पुगेर पुनः दृष्टि आई केयरमै आएर समापन भएको थियो ।
