काठमाडौं – नेपालले कुनै दातृ निकायको सहयोगविना आफ्नै लगानीमा बनाइरहेको पहिलो सडक कान्ति लोकपथ निर्माणको काम अन्तिम चरणमा पुगेको छ । कुलेखानी सडकको विकल्पको रूपमा उक्त सडक निर्माण गरिएको हो ।

कान्ति लोकपथ आयोजनाका अनुसार सडकको ६ किलामिटर ट्र्याक चौडा गर्न मात्रै बाँकी छ । कडा चट्टान भएका र पहिरोको जोखिम रहेका स्थान गरी ६ किलोमिटर मात्रै सडक बनाउन बाँकी रहेको आयोजनाले जानकारी दिएको छ ।

आयोजनाका सूचना अधिकारी इञ्जिनीयर अमिन्द्र खड्काले कान्ति लोकपथ आयोजना अन्तर्गत काम भइरहेको उक्त सडक निर्माणको काम अन्तिम चरणमा पुगेको जानकारी दिए ।

‘हाम्रो योजनाले हेटौंडाको बुद्धचोकदेखि ललितपुरको टीका भैरवसम्म हेरिरहेको छ,’ उनले लोकान्तरसँग भने, ‘कडा चट्टान भएका र पहिरोको जोखिम रहेका केही स्थान गरी ६ किलोमिटर ट्र्याक चौडा गर्न बाँकी छ ।’

उनका अनुसार हेटौंडाको बुद्धचोकदेखि ललतिपुरको सातदोबाटोसम्मको सडकको लम्बाई ९० किलोमिटर छ ।

उक्त सडक निर्माणका लागि सरकारले नेपाली सेनामार्फत् वि.सं.२०१३ मै ट्र्याक खुलाउने काम अघि बढाएको थियो । नेपाली सेनाले वि.सं. २०१६ मा उक्त सडकको ट्र्याक खोल्ने काम सम्पन्न गरेको थियो ।

ट्र्याक खोलिसकेपछि विभिन्न राजनीतिक उतारचढावका कारण सडक निर्माणको काम अघि बढ्न नसकेपनि पछिल्लो समय सो सडक निर्माणको काम अन्तिम चरणमा पुगेको हो । चालू आर्थिक वर्षभित्रै ठूला सवारी साधन गुड्ने गरी काम भइरहेको सूचना अधिकारी खड्काले बताए ।

निर्माणको काम वि.सं. २०६४ सालमा शुरू भएको थियो । चालू आर्थिक वर्षसम्म आइपुग्दा साढे ३२ किलोमिटर कालोपत्रे भइसकेको र ४० दशमलव ५ किलोमिटर ग्राबेल भएको उनले बताए ।

‘२०६४ सालसम्म विभिन्न कारणले सरकारको प्राथमिकतामा पर्न सकेन,’ उनले थपे, ‘केही स्थानमा सडकको ट्र्याक चौडा गर्ने काम भइरहेकोले चालू आवभित्रै सहज तरिकाले ठूला सवारी साधन चलाउन मिल्ने छ ।’

चालू आवमा ६२ प्रतिशत कालोपत्रे

यसअघि नै साढे ३२ किलोमिटर कालोपत्रे भइसकेको सडकको चालू आर्थिक वर्षभित्र कुल ६२ दशमलव ५ प्रतिशत मात्रै कालोपत्रे गरिने छ ।

बाँकी रहेका स्थानमा ट्र्याक खोल्ने काम सकिएपछि चालू आर्थिक वर्षभित्रै कालोपत्रे गरिने आयोजनाले जानकारी दिएको छ ।

सडकको कुल चौँडाइ ९ दशमलव ५ मिटर खन्ने र त्यसमा ७ मिटर मात्रै कालोपत्रे गरिने आयोजनाले जनाएको छ । साढे ९ मिटर भित्रै एक मिटर चौडाइमा नाली निर्माण गरिने छ ।

आगामी आर्थिक वर्षको अन्तिमसम्म ७९ किलोमिटर पूरै कालोपत्रे गरिने योजनाका सूचना अधिकारी खड्काले बताए ।

उक्त सडक ७९ किलोमिटर निर्माणका लागि कुल लागत ३ अर्ब ३५ करोड रूपैयाँ लागत लाग्ने अनुमान गरिएको थियो । चालू आर्थिक वर्षसम्म आइपुग्दा १ अर्ब ८० करोड रूपैयाँ खर्च भइसकेको छ ।

कुल ९० किलोमिटर सडकमध्ये बाँकी ११ किलोमिटर सडक निर्माणको कार्य सडक विभाग र काठमाडौं उपत्यका सडक विस्तार आयोजनाअन्तर्गत निर्माण भइरहेको छ ।